Ang playboy - Gula 4

Giingnan ni Lowela si Caloy nga wala pa g’yud siya’y giubanan nga lalaki nga gusto’ng makig-outing kaniya. “Makatental ang ilang tanyag kay mobayad kuno sila og mahal basta mouban lang ko kanila. Apan wala pa g’yud masulod sa akong huna-huna uy. Karon pa ko nga ingon ani diay ang pangkwarta sa ubang mga entertainers sa bar,” ni Lowela pa.

“Kon pananglit muadto ko unyang gabii sa gitrabahoan mo nga bar unya muhangyo ko nga makigdate nimo sa gawas, dili ko nimo balibaran Wel?” pangutana ni Caloy kang Lowela. Ingon sa wala dayon makatubag si Lowela sa pangutana ni Caloy nga gituohan niya nga usa g’yud ka doktor.

Igo lang mipahiyom si Lowela. Taud-taud, migawas na kadto’ng babaye nga gi-examine ni Dr. Benjie. “Pasudlon ka na ni doktor day, ikaw na’y sunod,” matud sa babaye nga mideritso lang paglakaw. Nakahuna-huna si Caloy nga paabuton niya nga mogawas ug mahuman na og hiling si Lowela sa doktor.

Nagkalingaw lang si Caloy sa pagbasa-basa sa iyang selpon. Wala magdugay si Lowela sa sulod sa klinik. “Dali ka ra man lagi. O kay mailhan man ni doktor nga wala ko mahilabti mao nga wala siya magdugay paghiling nako. Gikomedyahan gani ko niya,” matud ni Lowela.

Migawas si Benjie sa iyang klinika ug nakit-an niya nga nagsultihanay si Caloy ug si Lowela. “Asa ka gikan dinhi Wel? Muadto ko sa Wild Orchids bar unyang gabii ha?” giingnan pag-usab ni Caloy si Lowela.

Gikuyogan ni Caloy si Lowela paingon sa gawas sa City Health department. Misakay’g taxi si Lowela ug ginuntan kini sa paglantaw ni Caloy. Sa hilom naghinam-hinam si Caloy sa pag-adto niya sa bar nga gitrabahoan ni Lowela inigka-gabii.

Gihuna-huna ni Caloy nga swerte kaayo siya kon si Lowela mosanong sa iyang hangyo nga magdate sila unya. Apan ang importante mao nga masuod niya pag-ayo si Lowela nga usa ka maanyag nga Bol-anon. (Sumpayan)