Nganong nag-inusara

Nganong nag-inusara man ka sa pag-hike, Nyor? Pangutana ni Carlo sa lalaki nga nakaabot niya duol sa fire hydrant sa Ayala. Domingo ron sa buntag. Kapin kun kulang alas sayis ang takna. (Di man siya tigdala og relo) unom na ka higayon  nga nag-abot sila ining tawhana nga wa pa siya kaila.

Iyang pangagpas, retirado nga pulis o military ning tawhana. Kay military og tupi. Maskulado ang lawas. Bisa’g sayisintahon na ang hitsura. Nangutana siya aron lang gyud sila magka-estorya. Kay kada kita nila, igo ra man silang magyangoay. Usahay moingon si Carlo “maayong buntag nyor” unya motubag lang sab ang tawo og “maayong buntag sab nyor” nitutok ni Carlo ang tawo ug nibuka ang baba.

“Mao ra sab ang hinungdan kon nganong nag-inusara ka,” pintok nga tubag sa nahimamat ni Carlo.

Magpulipuli sila’g lingkod sa fire hydrant nga pinintalan og lalag aron sa pag-ilis og ugang t-shirt. Nauna ni Carlo ang tawo. Pag-abot niya, human na’g ilis ang tawo, nakapahiyom si Carlo pagkadungog sa tubag sa tawo.

Sa mga ikahimamat ni Carlo sa mga opisina sa gobiyerno, Nyor iyang sampit sa mga lalaki nga di siya kaila sa ngalan. Usa siya ka CPA. Pero sa iyang pangidaron nga hapit na mosayisinta, semi-retire na siya.

Kanunay lang siyang nag-inusara og hike. Kay kon duna siya’y galgalon sa pagkuyog niya, di man gyud mahinayon. Alas singko sa buntag iyang igikan sa Buena Hills, Guadalupe diin tua iyang balay. Sa iyang asawa ug mga anak, way ganahang momata og sayo aron sa pag-ehersisyo.

“Kining atong gibuhat, sama ra sa pagsimba. Sa layo pa, daghang gustong mokuyog. Inig abot na’s oras, kon pukawon na ang mokuyog, manghuyatid. Manghuy-ab. Unya mobalik og katulog. Ug moingon, sunod na lang,” sa tawo. Nakatawa si Carlo sa katinuod sa gipamulong.

“Ilaila ta Nyor,” ni Carlo. Nitunol sa tuong kamot ngadto sa tawo. Gidawat sa tawo.  “Ako si Carlo Delana,” niya pa.

Ako si Dante Largo. Taga Apas” sa tawo.

“Diabetic sab ka?” ni Carlo.

“Mao gyud,” ni Dante. Ug nag-apir ang bag-ong managkaila. (Kataposan)