Ang komedyante - Gula 7
Pagkaugma, Domingo, si Rizza Mae pa gani maoy miuna pagkontak ni Elly ug misukna kon madayon ba ang ilang panagkita.
“Sure, kita ta karong hapon, ari sa downtown ta mag-abot,” abtik kaayo nga naka-reply si Elly. Gisabotan nila kon asa sila dapit mag-abot. Nakabantay si Elly nga mora’g may gusto kaniya si Rizza Mae.
May plano na si Elly kon unsay himuon niya kon magkita na sila si Rizza Mae inigkahapon. Naghinam-hinam na si Elly. Dili kay karon lang kini nahitabo nga mga babaye nga maibog ni Elly tungod kay anaa siya sa radyo, iya dayon nga matilawan.
Alang kang Elly nga lingaw-lingaw lang ang pagsulod og mabugnaw’ng lawak uban sa babaye nga nakagusto kaniya. Kon mapul-an na siya sa babaye, lihay kaayo siya nga dili na makigkita pag-usab.
Wala pa siya malimot nga ang kataposang babaye nga naibog kaniya ug iya g’yud nga naangkon, mipahinumdom ni Elly nga dili iya ang tanang panahon. “Akong iampo Elly nga makabawos ra ko nimo, masakitan ka ra ‘sab unya,” matud ni Pamela.
Wala pa’y alas kuwatro, didto na si Elly sa gikasabotan nila ni Rizza Mae sa downtown area. Diha nga nagkita na sila. “Wala ka ba gutoma? Mangaon usa ta unya ubani ko kay aduna kita’y adtuon,” matud ni Elly. Mipahiyom si Rizza Mae.
Nakapahibulong kini kang Elly. “Kutob ra dinhi sa downtown ang atong panagkita,” sa dalaga pa.
“Apan nganong dili ka man mouban nako?” ni Elly pa. “Gitug-anan ko sa akong ig-agaw nga si Pamela kon unsa ka nga pagkatawo. Gusto unta ko nimo apan nahadlok ko nga mahisama lang unya ko ni Pamela,” matud ni Rizza Mae.
Wala makatingog si Elly. Nasabot ra ba unta niya nga may migitib na nga pagbati sa iyang dughan alang kang Rizza Mae. “Salamat nga nagkaila ta, naluoy kaayo ko’ng Pamela nga imo lang gibinuangan, bye,” ni Rizza Mae nga mibiya kang Elly. (Kataposan)
- Latest
