Ang komedyante

Gula 5

Samtang lingaw kaayo ang nanag-disco apan gitugaw ang ilang kalipay sa kalit nga pagbunok sa uwan. Nag-iyahay pagpangita’g kapasilongan ang mga tawo. Nagkuyog sila si Elly ug Rizza Mae pagpaingon sa bakante nga gamay’ng tindahan.

Dunay laing babaye ug lalaki nga ilang nakauban sa pagpasilong. Nasabtan ni Elly nga managhigugmaay ang duha kay paraygon man kaayo ang babaye nga mibai-id sa lalaki nga diha sa iyang likod nagtindog.

Mikuha si Elly og panyo gikan sa iyang bulsa ug gitrapohan niya ang bukton ni Rizza Mae nga nabasa sa uwan ug wala lang niya panumbalinga nga basa usab ang iyang mga bukton.

“Na pagka caring nimo Elly uy, ma-in love man lang ta ana,” matud ni Rizza Mae nga nagngisi. Napalingi ang babaye’g lalaki nga diha sa duol kanila. Mikusog pagbunok ang uwan ug mora’g wala nay purohan nga motuang kini dayon.

Diha nga nahuman na ni Elly pagtrapo ang mga bukton ni Rizza Mae, gikuha sa dalaga ang panyo ni Elly ug siya na usab maoy mitrapo sa basa nga bukton sa komedyante sa radyo. “Wow, pagka-sweet ‘sab nimo Rizz uy, mosamot g’yud ko nga ma-in love nimo ana,” ni Elly pa.

“Kasikat nimo sa radyo, managinot kaha ka nako?” matud ni Rizza Mae nga nagtuo nga bugal-bugal lang ang gisulti ni Elly kaniya. “Mao bitaw g’yud ang makaapan sa akong role sa radyo kay komedyante ko, dili na hinuon ko tuohan kon manguyab,” matud ni Elly.

Wala motubag si Rizza Mae. Nakabatyag na lang siya nga anam-anam na siya nga gigakos ni Elly. Mauwaw unta si Rizza Mae nga magpagakos ni Elly kay dili pa niya kini boyfriend ug nga diha’y tawo sa duol kanila.

Nabalaka si Rizza Mae nga basin og nakaila unya kaniya ang duha. Apan ingon sa nahimong kandela nga giukbok si Rizza Mae ug igo lang niya nga gipasagdan si Elly nga migakos kaniya. (Sumpayan)