Ang komedyante - Gula 4

Sa pagpamauli nila ni Elly ug ubang mga dramatorgo, gibahin nila ang gibayad sa barangay kapitan. Gibahinan usab ni Elly si Rizza Mae sa iyang nadawat.

Gihapit nila si Rizza Mae sa gipuy-an niini sa dalan Salvador, dili halayo sa barangay hall sa Labangon. “Good night Rizz,” matud ni Elly sa dayong kanaog sa dalaga gikan sa ilang sakyanan.

Pagka sunod adlaw, mi-text ni Elly si Rizza Mae ug midapit kaniya nga mang-disco sila inigka-gabii kay aduna may kalingawan sa ilang lugar. Wala g’yud mobalibad si Elly. Gipahibalo dayon ni Rizza Mae ang iyang mga amiga nga moadto ang iyang higala nga taga radyo.

Tuod, wala gayud sipyata ni Elly ang pag-adto sa ila ni Rizza Mae sa pagka gabii. Tumong kaayo kay Sabado inigka-ugma ug wala’y recording ang mga dramatorgo sa radyo. “Oki kaayo Rizz kay puwede ra ta magbuntag karon kay Sabado man ugma,” ni Elly pa nga nagngisi.

Gipaila-ila ni Rizza Mae si Elly ngadto sa iyang mga amiga. Mauwawon ang mga higala sa dalaga nga nakighimamat ni Elly kay nauwaw sila sanglit taga radyo man ang ulitawo.

Wala madugay, nagsugod na pagpatugtog og mga tukar ang operator. Daghan kaayo nga midugok ni Elly pagkasayod nga usa siya ka dramatorgo sa radyo. “Maayo kay misuroy ka g’yud dinhi sa among lugar Ly. Tigpaminaw baya kaayo mi nimo, komedyante kaayo ka sa radyo no?” matud sa usa ka babaye.

“Gidapit ko ni Rizza Mae nga mangdisco kuno mi dinhi. Wala ‘sab ko mobalibad kay mga friendly man kaayo ni’ng mga tawo dinhi,” giingnan ni Elly ang medyo hamtong na nga babaye.

“Sige, enjoy mo. Akong pag-umangkon si Rizza Mae,” matud sa babaye. Taud-taod, nanayaw dayon sila si Rizza Mae ug Elly, apil ang ilang mga barkada. Dihang may nakakita kanila nga nanayaw, mikalit lang kapuno ang sayawan. Sila g’yud si Rizza Mae ug Elly ang magpares. (Sumpayan)