Ang komedyante

Nalingaw kaayo si Rizza Mae nga mitan-aw sa variety show nga gipasundayag sa taga radyo didto sa ilang sitio nga sakop sa Barangay Labangon. Puwerte nga makabahak-hak og katawa ni Rizza Mae ilabi na kon mogawas na ang komedyante.

Ang komedyante mao g’yud ang kanunay nga tutokan ni Rizza Mae kon mogawas na sa stage ug magsige’g pangomedya. Anam-anam nga mikuliot si Rizza Mae sa nagdasok nga katawhan nga nagpunsisok atubangan sa stage.

Hangtod nga miabot si Rizza Mae duol na sa stage. Miabot gayud ang higayon nga nakaalinggat ang komedyante ni Rizza Mae nga nagsige kini og tutok kaniya. Naandan na sa mao nga komedyante nga mohimo’g komedya nga magpili siya og usa sa mga nanan-aw.

“Gisuwerte kaayo ko karon pag-abot nako dinhi sa Sitio Bugnay bay,” matud sa komedyante ngadto sa iyang kauban. “Ngano man kuno bi?” nagpatuso-tuso ‘sab ang kauban sa komedyante.

“Nakauyab dayon ko pag-abot nako ganina!” pagarbo sa komedyante ngadto sa iyang kauban. “Yati ra? Kinsa gud tawon ang mikubit nimo nga kabati nimo’g nawong?” tubag sa kauban sa komedyante.

“Mao lagi, dia man gani siya karon mitan-aw g’yud nato,” matud sa komedyante. Kunohay wala motuo ang kauban sa komedyante ug gipatudlo kon asa dapit ang giingon niya nga iyang nauyab.

“Ah, dili lang ko uy… mauwaw man ko,” matud sa komedyante nga naghiko-hiko ug usahay motalikod apan nagpasiklap sa nahimutangan ni Rizza Mae. Nakapaentriga kini sa mga tawo nga mitutok ngadto sa dapit nga gitan-aw sa komedyante.

Gipangutana ang komedyante sa iyang kauban sa kolor sa sinena nga gisul-ob sa giingon niya nga iyang nauyab. “Nag-T-shirt man na siya og green ug may laso ang buhok,” matud sa komedyante nga naghiko-hiko na ‘sab.

Si Rizza Mae nga nakabantay nga mora’g siya ang gipasabot, mipasalipod sa babaye nga diha sa iyang atubangan.

“Ah, mora man siya og nauwaw nga akong gipanabi ang among relasyon,” dugang sa komedyante. (Sumpayan)