Dili malarag ang bulak

Wala na ang iyang asawa nga si Concha, mipanaw na kini kay giataki sa kasingkasing. Sa ilang panagluon sa sala’g sa kaminyoon wala gyud sukad sila magkalalis o magkaaway sama sa ubang magtiayon. Kun masabtan ni Jimmy nga medyo abuton na og sapot si Concha iya dayon kining komedyahan ug kun dili niya komedyahan, iya kining gakosgakoson.

Ingon ini ang iyang gibuhat sa iyang asawa. Sa tinuod lang, dili si Concha ang nakapapitik sa iyang kasingkasing kay dili niya unang gugma ang iyang asawa. Napugos lang siya sa pagpakasal niini dihang nagsabak na kini sa ilang anak nga si Rina. Ang binuhat nga maoy natingban sa iyang pagmahal mao si Flordelis nga taga dinhi sa ilang dapit. Dugay na silang wala na magkita si Flordelis, tingali kapin na sa napulo ka tuig ug si Rina mag-dose anyos na karon.

“Daddy, Daddy, duna lagi babaye nga nangutana nako didto sa among eskuylahan. Iya kong gipangutana kun anak ba ko ni Jimmy, ako siyang gitubag nga “Oo”, anak ko nilang Mommy Concha ug Daddy Jimmy,” nagkayungit si Rina sa pagsugilon.  “Kinsa may ngalan sa babaye, day Rina?” nagpakisayod si Jimmy.

“Iya pangalan? tayim pa, ha..kuan..kuan...Flordelis man to iya giingon nako, Daddy ug imo kuno siya amiga,” ni Rina pa nga nagpitokpitok ang mga mata.

Sa pagkabati ni Jimmy sa gisulti ni Rina, labi na sa pangalan sa babaye kalit lang namalikhaw sa iyang kagahapon ang mga pulong nga iyang gisaad sa binuhat nga iyang gimahal. Niya pa niadto, “Ikaw lamang ang babaye nga akong mahalon, Flordelis ug kining bulak sa Adelfa nga akong kinutlo karon, simbolo kini sa atong gugma...” Apan wala kadto matuman kay naminyo man siya kang Concha. Ug tungod niini, nakahukom siya nga iyang pakigkitaan si Flordelis. Ug segun sa iyang nasayran si Flordelis diay ang District Supervisor sa tunghaan publiko sa lalawigan. Ug dihang nagkita sila sa kanhing hinigugma, gidala siya ni Flordelis sa dapit nga maoy ilang abotanan kaniadto, ang Dream Flower Park nga nahimutang sa usa ka bukirang bahin sa siyudad.

“Kumosta ka na, Jim?” hinay ang tingog ni Flordelis.

“Nia, kami na lang si Inday Rina ang nagtikawtikaw sa among balay,” hinay usab daw hagawhaw ang tubag ni Jimmy.

“Condolence sa nahitabo sa imong asawa,” wala motan-aw si Flordelis kang Jimmy. “Pasayloa ko, nakasala ko nimo,” ni Jimmy pa.

Igo lang mipahiyom si Flordelis. “Okey lang, maayo ka kay naminyo man ka, apan ako, hangtod ron dalaga pa...”

Unya mitindog si Jimmy human niya mabati ang gisulti ni Flordelis ug mikutlo sa usa ka pungango nga may bulak nga Adelfa ug iyang gihatag sa dalaga. “Way pagkalarag ang akong gugma kanimo.Ug iyang gigakos si Flordelis kinsa naghupot na sa bulak sa Adelfa. (Kataposan)