Ang mentin ni Berto

Kilumkilom nang miabot sa ilang payag si Berto gikan sa sanggotan. Nakita niya nga nagdula ang duha niya ka anak babaye sa tugkaran sa ilang payag. Nagkadusingot si Vicky nga maoy nagbantay sa andoanan samtang nangita’g katagoan si Lolit. Nagdula sila’g tagotago....!

“Unsay sud-an ta karon...?” Nangutana si Berto kang Exal samtang nagtabyog sa duyan sa kamanghuran nilang anak.

“Buwad lang gihapon. May gamay pang nahabilin ganihang paniudto,” tubag ni Exal.

“Mantikaang hipon sa pamahaw, sinugbang buwad sa paniudto. Parat oyyy...!” Nagkanayon si Berto nga nagpahimutang sa sam-iran kilid sa ilang payag ug dayong tawag kang Vicky.

“Palit lawlaw sa kang Piring...!” Gitunol ni Berto ang dos pesos ngadto kang Vicky. May gilay-on ang tindahan ni Piring gikan sa payag ni Berto. Natagboan niya ang usher nga si Tony Ecat samtang naglakaw si Vicky sa dalan nga ipakuha ang mentin sa iyang amahan.

“Di ko oyyy, kasab-an ‘nya ko. Ipapalit ra ba’g lawlaw ang dos pesos...!”

Sa pamugos ni Tony Ecat, gikuhaa’g peso ni Vicky ang igpapalit lawlaw sa tindahan ni Piring. Gipaksit sab dayon ni Tony ang mentin ni Berto.

“Nganong duha ra man ang napalit mong lawlaw?” Singka pangutana ni Berto ngadto sa iyang anak nga si Vicky.

“Kay namugos man si Tony Ecat nga ipakuha ang imong mentin sa masiao...!” Nangatarungan si Vicky.

Namula ang nawong ni Berto sa kapungot nga mikuha sa kiwiskiwis gisuksok sa atop sa ilang payag ug gilapdosan kausa si Vicky sa may sampot. Mihilak ang bata nga nagpalaban sa inahan. Human sa alam-alam sa inahan, misulod si Vicky sa lawak-katulganan nga wa manihapon. Nagbakho intawon si Vicky sa kasakit sa lapdos hangtud nakatulog na lang nga dulog kang Lolit.

Sayo sa buntag, gipukaw ni Tony Ecat ang naghagok nga Berto.

“Migawas ang imong mentin 432.  Hatagi ko’g meron, Bert...!” Nagkanayon si Tony Ecat kang Berto nga mitimbakuwas sa higdaanan. Gidawat ni Berto ang kantidad nga gitunol sa nahisgutang usher ug misulod dayon sa payag. Gi-ihap ni Berto ang nadawat nga tahan dungan ang pagpukaw kang Vicky.

“Nganong wa mo ihurot ang kuwarta sa akong mentin...?” Matud pa sa amahan nga si Berto ngadto sa bag-ong nagmata nga si Vicky.

“Mosamot ang imong kasuko kun gihurot pa ni Vicky sa imong mentin...!” Sakgaw ni Exal agi’g paglaban sa anak.

Wa pa gani katubag sa pangutana, gilanit na sab ni Berto ang gisuksok nga kiwiskiwis ug gilatus si Vicky. Migakos sa nahigmatang inahan si Vicky sa dakung kahadlok.

Milaban ang inahan sa anak nga nag-ingon: “Buot mo bang patyon ang imong anak tungod lang sa mentin sa masiao...?”

Mikalma si Berto sa iyang kapungot ug nagbagotbot nga impas na unta ang tanang utang. (Katapusan)