Sugal makaguba’g pensamiento
P400 mil na ang pilde ni Jack sa balay-sugalan. Gusto ni Jinks, iyang asawa, nga moundang na kini aron di madak-an. Apan wala mopatuo ang sugarol nga bana. Nangatarongan hinuon: “Ay, pun-an pa nako’g P100 mil, Day. Buwahan, mahusto nga P500 mil. Kay ingkaso’g mapilde pa, naa man koy Rebate nga 5%.”
Walay nahimo si Jinks. Mipasulabi gyud ang kagahi ni Jack. Usa ra ka taya ang gipunong P100 mil. Pilde dayon. Modugang pa unta si Jack pagpangutang sa pinanser. Pero gibalibaran.
Wala madugay, dunay Pit Boss nga miduol ni Jack ug mitanyag: “Unsa man, Sir, gusto mo na kuhaon ang imong 5%-Rebate sa P500 mil mong pilde?”
“Oo sige, maayo hinuon. Pila bay akong madawat?” Ni Jack pa nga miyahat sa Pit Boss. “P25T, Sir!” Otomatik nga tubag sa dakodako sa balay-sugalan, kinsa may dalang papeles nga gipapirmahan ni Jack.
Walay 15 minutos miabot sa lamesa ang balor nga P25T-chips sa atubangan ni Jack. Human og dawat niini, gipatad dayon ang tanan ni Jack. Apan demalas gyod si Jack niadtong adlawa. Gikabig gihapon iyang kataposang taya.
Bug-at ang pamayhon ni Jack nga mibarog ug huyhoy iya mga abaga nga milakaw paingon sa gawas sa balay-sugalan. Giagbayan niya iyang misis nga nagbaguod ang nawong sa gihambin nga problema.
“Haskang paita gyod ning sugarol, no?” Komentaryo sa card dealer nga nakapanglingolingo. “Imbes P400T ra untay pilde, gipun-an pa gyod og P100T aron mahimong P500T. Kay nag-apas sa P25T nga Rebate. Hain man diay dako: P25T o P100T?”
“Mao gyod na, Bay, ang dangatan sa tawo nga maungo na pag-ayo sa sugal. Maguba gyud ang hustong pensamiento.” Dugtong panahom sa laing card dealer, kinsa naluoy kaayo sa kahimtang sa magtiayong Jack ug Jinks. Unya, mipadayon: “Di kay ang pensamiento ray maguba. Kun dili, hasta ang kamalinawon sa pamuyo sa ilang tibuok pamilya, maguba sab!” (Kataposan)
- Latest
