Tigmo

Domingo. Alas diyes sa buntag. Mao pay pagmata ni Jason kay nalapoy sa iyang gi-research sa Internet mahitungod sa subject niya sa Accoun-tancy. Gigawas niya ang iyang mama Tina nga nanilhig og mga layang dahon sa ilang nataran. Gilibutan man ang ilang balay og dagkong kahoy sama sa Chicos, Mahogany, Narra ug Acacia.

“Ma, hain mas Papa Ben?” niya pa. “Nilakaw na. Nagbasketbol na!” ni Tina sa pinabundak nga tono.

“Nganong nangita man ka?” dugang sa inahan.

“Mangayo untag ko’g kuwarta. Para gasto sa akong term paper” ni Jason.

“Kana, husto ka. Siya gyud imong unahon og pangayo’g kuwarta. Unya kun kulang iyang hatag, ako na lay dugang” sa inahan nga nagsige lang gihapon og panilhig. Nakapangawot sa ulo si Jason nga nagsud-ong sa iyang inahan. Di niya mabasol iyang inahan nga way maayong buot sa iyang amahan.

Bugtong anak si Jason. Ug problemado siya’s iyang mga ginikanan. Magbuwag unta. Apan siya ang nibabag. Gusto lang niya nga malinawon sila. Tibook silang pamilya. Pasagdahan na lang iyang papa nga dunay kabit. Si Mama niya puwede maglingawlingaw. Kuyogkuyog sa iyaan nga biyuda. Isipon na lang iyang kaugalingon nga biyuda na sab.

“Husto ka anak. Kun gipul-an na imong papa nako, wa koy mahimo. Kana iyang gibuhat, nagtukmod na sab nako nga puwede na manguyab sab og laing lalaki” sa iyang mama usa ka higayon sa ilang paghinabi. Usa ka tuig na silang ingon niini.

Sa batan-on pa, basketball player iyang amahan. Busa ang pasangil sa amahan kun moadto sa kabit, magbasketbol. Kun mananghid iyang papa nga magbasketbol, makasabot ra iyang mama. Apan may mga higayon nga dili magdala og bola iyang papa nga mobiya sa ilang balay sa baryo Sakhod ning dakbayan.

Malinawon tuod silang iyang ginikanan. Apan wa nay uban og katulog, lainlain na’g lawak. Ipon sa usa ka balay. Way tingganay. Magtunga sa gastohan. Apan dili na magdungan og kaon.

Wa na sila’y hilabtanay kun asa molakaw ang usa’g-usa. Ang asawa puwede mosuroy bisa’g kadlawon na mouli, o bisa’g pila ka  adlaw di mouli. Way pakialam ang bana. May mutual understanding na sila nga wa na lay hilabtanay. Iya-iya na la’g panaw.

Labi na nga puro sila may trabaho. Si Ben chief waiter sa usa ka 5 star hotel. Si Tina teller sa banko. “Laing matang sa basketbol ang gidula ni papa karon, Ma?” ni Jason, nanglugod pa’s iyang mga mata.

“Shoot daan una modribol!” sa iyang mama.  “Sama sa tigmo!” ni Jason. Ug nagkinataw-anay na lang sila. (Katapusan)