Gugma nga makabuang - Gula 4

Nahibulong si Lino kun ngano nga nakahisgot man si Nympha bahin ni Hazel. Mga tuig na kapin nga gilumpong niya sila’ng duha isip iyang mga girlfriends ug wala gayud siya masakpi.

“May nailhan ka ba nga Hazel nga promo girl sa usa ka beer company?” giklaro na g’yud ni Nympha ang iyang pangutana. Miatubang si Nympha kang Lino ug nakita sa ulitawo nga anam-anam nga nanaligdig sa kaapingan niini ang mga lusok sa luha. Gikulbaan si Lino. Nabuking na g’yud diay siya ni Nympha. Apan wala na si Hazel sa iyang kinabuhi. Nakahukom na gani si Lino nga pakaslan na lang g’yud niya si Nympha karon nga wala na siya’y laing hinigugma.

“Nasayod ka na diay? Dili na lang ko modugang pa kay sigurado ko nga nasayod ka na. Mangayo na lang ko nimo og pasaylo Nymph,” matud ni Lino sa mapaubsanon kaayo nga tingog.

Misamot nga nanglugmaw na g’yud ang mga luha sa mga mata ni Nympha ug milubad na ang iyang tingog. “Wala ko magdahom Lino nga ingon ka diay niana nga matanga sa pagkatawo. Gibuwagan ka ni Hazel bisan og may nahitabo na kaninyo kay usa siya ka masinabtanon nga pagka babaye. Gitugyan ka niya kanako,” ni Nympha.

Miduko si Lino ug miginhawa’g lawom.  Wala siya makaantos sa mga pulong nga gibatbat ni Nympha. “Naluoy bitaw ko ni Hazel apan mao may iyang hukom nga hatagan ta niya’g higayon nga maoy magkadayon,” matud ni Lino.

“Magkadayon? Sama sa gibuhat ni Hazel kanimo Lino, mao usab ang akong buhaton. Dili nako igsapayan nga giangkon mo na ako sa makadaghan nga higayon apan dili ko makig-uban sa tawo nga sama kanimo ka banyaga. Gisaaran ko si Hazel nga dili ko na ipadayon ang atong relasyon. Goodbye Lino,” ni Nympha nga misirit paglakaw.

Ingon sa nahitiurok si Lino. Wala masayod unsay himuon ug igo lang milantaw sa nagkalayo nga bayhon ni Nympha nga mitabok sa karsada. (Sumpayan)