Nasakpan

Gula 5

Mao gihapon ang gihimo ni Dave, nagpatulog-tulog siya diha nga misulod na si Cherry sa balay. Pagsulod ni Cherry sa ilang lawak, nag-ilis kini og pangkatulog. Wala magtan-aw si Dave kun unsay gihimo sa iyang asawa, apan giigmat niya ang iyang dunggan.

Mora’g namatngonan ni Dave nga nag-text si Cherry sa iyang selpon. Wala madugay, mihigda kini sa pikas bahin sa ilang higdaanan. Nagpaniid lang si Dave, wala siya maglihok aron magtuo gayud si Cherry nga natulog na siya.

Unya nakadungog na si Dave nga mihagok na si Cherry. Wala gayud siya molihok ug naniid lang kay tingali’g nagpaka-aron-ingnon lang si Cherry nga nakatulog, apan wala na g’yuy putol ang iyang paghagok.

Hinay’ng mibangon si Dave. Pinaagi sa hanap nga hayag sa lamp shade iyang nakita nga nagtalikod si Cherry ug nag-atubang kini sa bungbong. Abtik nga gibuksan ni Dave ang bag ni Cherry ug gikuha ang yawe sa kotse.

Gilingi niya’g balik ang iyang asawa nga maayo’ng pagkahinanok. Mainampingon siya nga migawas sa kuwarto ug dayon migawas siya sa balay ug miadto sa giparkingan sa awto.

Gibuksan ni Dave ang awto ug gihikap niya sa sidsid nga bahin sa seat cover ang sekreto niya nga gibutang nga voice recorder. Diha nga nakuha na ni Dave ang voice recorder, iyang gibalik pagsirado ang pultahan sa kotse.

Giuli niya sa bag ang yawe sa kotse aron dili mabantayan ni Cherry nga gibuksan niya ang kotse. Gikuha niya ang iyang headset ug gikonektar sa voice recorder. Gi-rewind ni Dave sa sinugdanan aron madunggan niya kun unsay mga tingog nga nakuha sulod sa kotse. Sa unang bahin, wa siya’y nadungog. Taud-taud, nabati niya si Cherry. “Hello, Hon? Anha na ko paingon, pag-atang na lang daan sa mao gihapon nga lugar kay hapiton tika.” Taud-taud. Mora’g gibuksan ang pultahan sa sakyanan.  (Sumpayan)