Isla Paraiso - Gula 239 “Giunsa

“Giunsa mo man, sister Veronica, pagtultol kining akong gipuy-an?” Pakisayod ni Corporal Benturada.

“Gitug-anan ako sa kauban mong polis kun hain ka magpuyo,” tug-an ni sister Veronica. “Giingnan ko niya nga sa luyo sa simbahan sa Guadalupe ako mokanaog unya pangitaon ko ang kalye  Guatemala. Tuod man, wala ko maglisod pagtultol. Pag-abot nako sa usa ka eskinita, nangutana ako kun hain ang imong gipuy-an.”

“Bitaw, uy,” ni Corporal Benturada pa. “Tingali mahinungdanon gayod kaayo ang imong tuyo kay gianhi mo man gayod ako sa akong gipuy-an.”

“Mahinungdanon sa tanang mahinungdanon,” ni sister Veronica pa. “Bahin kini sa suod mong higala ug kauban sa trabaho...si SPO3 Rey Corpuz.”

Wala makatingog si Corporal Benturada. Mora siya’g nasud-ipan sa gisulti sa Madre.

“Nasayod ko nga suod kaayo kamo,” mipadayon ang madre. “Wala ka bay kasayoran mahitungod sa mga dapit nga posible niyang adtoan?”

“W-wala gayod, sister Veronica,” namakak si Corporal Benturada. Nahinumdom siya nga nagbaod si Rey nga dili patug-anon kang bisan kinsa kun hain siya karon.

“Nabalaka na kaayo ko sa iyang kahimtang karon,” miligdong ang panagway ni sister Veronica.” -- Sumpayan pa