Nasakpan - Gula 2

Gikontak ni Dave si Cherry sa iyang cellphone apan dili makontak. Naglagot na g’yud kaayo si Dave sa gihimo sa iyang asawa tungod kay kanunay na niya kini nga gihimo. Wala makatulog si Dave ug nakabantay siya nga mga alas tres na sa kaadlawon nga nadunggan niya ang andar sa makina sa awto sa iyang asawa nga mi-parking atubangan sa ilang balay. Nagpasumangil si Dave nga natulog na. Makasulod man gihapon si Cherry kay aduna man siya’y kaugalingon yawe. Wala g’yud maglihok si Dave samtang nagtakilid. Gipiyong niya ang iyang mga mata apan nagpaminaw siya kun unsay himuon sa iyang asawa.

Mitingog ang call alert sa cellphone ni Cherry. Gidali kini sa pagpunit ni Cherry ug migawas gikan sa kuwarto. Nasabtan ni Dave nga dili gusto sa iyang asawa nga madunggan ang ilang panaghinabi. Gitingkag pag-ayo ni Dave ang iyang dunggan aron madungog niya ang isulti sa iyang asawa.

“Yes, dia na ko sa balay… cge ‘til next time,” matud ni Cherry dayon niini og balik sa kuwarto. Wala usba ni Dave ang iyang porma aron magtuo gayud si Cherry nga nakatulog na siya. Human og ilis ni Cherry sa iyang sapot pangkatulog, mihigda kini ug wala magdugay, nadungog na ni Dave ang paghagok sa iyang kapikas. Nakapanghupaw si Dave. May miturok na karon nga pagduda sa iyang kaisipan nga nagbudhi ang iyang asawa. Nakahuna-huna siya og paagi. Kinahanglan nga masakpan niya ang iyang asawa kun tinuod man kini nga nagbudhi kaniya. Pagka-ugma, miadto siya sa baligyaanan og voice recorders. May napilian siya nga electronics recorder nga ang battery molahutay og tulo ka adlaw nga walay hunong-hunong sa pag-rekord. Gamay ra kini kaayo ug sensitibo pa gayud nga mo-rekord bisan sa hinay lang nga tingog.

Nagpalit si Dave og duha kabuok recorders. Sayo siya nga mipauli sa balay ug naabtan niya si Cherry nga nag-uyog-uyog sa sandiganan sa lingkoranan. “Palihog ra ko og hugot sa bolt sa lingkoranan sa kotse Dave, magtingog-tingog man,” ni Cherry.

“Wala’y problema. Cge, mag-ilis usa ko. Sulod na lang sa balay ug ayaw lang sirad-i,” matud ni Dave. Sa hilom nalipay si Dave kay mora og miduyog kaniya ang panahon. (Sumpayan)