Nasakpan

Nagduda si Dave nga ang iyang misis miduwa og laing team kay kanunay lang kini nga molakaw, ilabi na kun tua siya sa opisina.

Adunahan og pamilya ang asawa niya nga si Cherry mao nga sa pagkaminyo nila gipalitan kini og kotse sa iyang mga ginikanan. Sa hilom nagmahay si Dave nganong gituyoan niya ang pagpanguyab kaniadto ni Cherry nga unta nasayod man siya nga dili sila managsama og kahimtang.

Ordinaryo lang nga office worker si Dave sa kompaniya nga tigbaligya og sakyanan mao nga nakapalit usab siya’g kotse sa data-data nga pagbayad. Kaniadto, dunay mga higayon nga gusto’ng mogamit si Cherry sa iyang kotse apan maikog kay gamiton man usab ni Dave.

Diha’y higayon nga nahilngan ni Dave ang selpon ni Cherry ug nakita niya ang mensahe gikan sa iyang ugangang babaye nga nagmahay sa iyang anak kun ngano nga siya ang gipili nga pamanhon nga dili sama kanila og kahimtang.

Gidali-dali pagtan-aw ni Dave sa sent items kun unsay gi-reply ni Cherry sa mensahe sa iyang inahan nga nagdala’g pagmahay nga dili adunahan ang gipili niya nga bana.

Napasiga ang mga mata ni Dave. Ang mensahe gi-send sa numero sa iyang ugangan ug nagkanayon. “Mao lagi mommy, sipyat g’yud.” Ingon sa kalit lang naminghoy si Dave sa iyang nabasa.

Gibalik ni Dave ang selpon ni Cherry ibabaw sa lamesa ug migawas siya sa kuwarto. Miadto si Dave sa grahe sa iyang sakyanan ug nagpasumangil nga adunay gihiling, apan sa hilom nanglugmaw ang iyang mga luha.

Wala gayud masayop si Dave nga wala’y gusto kaniya ang mga ginikanan ni Cherry. Masabot niya kini kun sila magkakita kay uga kaayo kini og tinagdan kaniya. Naghinuktok si Dave kun unsay iyang himuon.

Gibasol ni Dave ang iyang kasing-kasing nga nahigugma og adunahan. Nakasabot siya nga gisugot siya ni Cherry kaniadto sa nagtungha pa sila tungod kay sikat-sikat man siya sa klase tungod sa iyang pagka-utokan.

Diha’y gabii sa pag-uli ni Dave sa ilang balay, wala na usab ang kotse ni Cherry. Sagol kalagot ug kasagmuyo ang iyang gibati. (Sumpayan)