Isla Paraiso

Isipon na lang ni Rey nga usa ka makalilisang nga daman ang tanan nga midangat kaniya. Mora’g kalit lang nausab ang iyang panud-ong sa kinabuhi human niadtong hitabo diin daw milagro nga naluwas siya gikan sa tino nga kamatayon. Inanay siyang nakaamgo nga dili gayod diay maangkon sa tawo ang usa ka butang kun ang maong butang dili gayod angay kaniya.

Karon ingon sa nakabaton na siya’g kalig-on sa kaugalingon sa pagdawat sa kamatuoran nga si sister Veronica dili gayod angay kaniya. Hangtod karon si sister Veronica gihapon ang gipitik sa iyang kasingkasing. Apan maantigo na siya karon modawat sa kapakyasan sa gugma.

Hangtod sa kahangtoran ang pagmahal niya kang sister Veronica. Wala’y laing binuhat nga makapuli sa dapit nga iyang gigahin niini sa iyang kasingkasing. Mitidlom sa iyang kaunoran, kaunoran ug kabukogan ang iyang pagmahal kang sister Veronica.

Apan wala’y katumanan ang maong gugma. Wala motugot ang kahigayonan nga sila ang magkauban sa tibuok nilang kinabuhi. Karon ihatag na niya kang sister Veronica ang kagawasan. Dili ug dili na gayod siya magsamok pa niini. Buot siya nga makabaton usab ang madre og kalinaw sa hunahuna. Karon inanay na siyang misagop sa giingon nga “letting go is just another way to say I always love you so.”

Misantop sa kahimatngon ni Rey nga nahigugma siya kang sister Veronica sa dili tukmang panahon. -- Sumpayan pa