Beauty Queen

Gula 4

Makabungog ang pagakpak sa katawhan dihang nahuman na si Emerson sa iyang pagbalak pahinungod ngadto sa maanyag nga beauty queen. Garbo kaayo siya kay nakasabot siya nga gikahimuot kaayo sa mga nanan-aw ang iyang balak.

Gisunod dayon ang royal dance diin ang beauty queen makigsayaw sa iyang prinsipe. Wala na ibuwag ni Emerson ang iyang panan-aw ngadto sa beauty queen kang kansang kaanyag sa hilom nakapabihag sa iyang kasing-kasing.

“Ngilngiga diay nimo nga mobalak dong uy, swerte g’yud kaayo nga nagkaila ta karon ug giimbitar ko ikaw nga motambong sa bisperas sa among pista kay kun wala pa, palpak g’yud unta ang bahin nga adunay mopahinungod og balay sa beauty queen,” matud sa kapitan sa barangay.

Miduol si Ronnie kang Emerson nga nagngisi sa kahimuot. Gilamano niini ang higala nga karon pa niya masayri nga may abilidad diay sa paghan-ay og mga garay. Dayon, gisunod ang bahin nga ang beauty queen ibaligya na sa publiko.

Diha’y misinggit pagpalit sa buwak og P50. Miduol dayon kini sa nahimutangan sa beauty queen aron iyang sayawan. Apan wala pa gani kini makasayaw, adunay laing lalaki nga misinggit og P100. Wala makadayon pagsayaw ang unang lalaki nga mobayad unta og P50.

“Sayawan nako ang beauty queen bai Ron,” giingnan ni Emerson ang iyang higala nga si Ronnie. “Palabwanay na sa kuwarta bai ug ang labing dako maoy makabayle sa beauty queen,” matud ni Ronnie.

“One thousand pesos!” misinggit si Emerson dungan sa pag-isa niya sa tibuok usa ka libo nga papel de-banko. Daw natuk-an ang kalalakin-an sa probinsya. Nasayod si Emerson nga ang mga taga probinsya dili na makaapas sa mao nga kantidad kay pangtapas ra tawon og tubo ug pagpanguma ang ilang trabaho.