Bugti sa kapakyasan
Gula 6
Sa pangedaron nga 19-anyos, kadto pa makakita si Lanie og lawas sa usa ka hamtong na nga lalaki nga sa kinatibuk-an wala’y sapot. Nahuna-huna na karon ni Lanie nga susama ra g’yud diay ang bation sa babaye’g lalaki kun makakita sa hubo nga lawas sa opposite nila nga sex.
Takulahaw lang nga nakatagpilaw si Lanie. Nakamata siya paglabay sa tunga sa oras ug nga wala diay makasul-ob sa iyang sinena. Gitrangkahan hinuon niya ang pultahan sa lawak. Migawas si Lanie ug gipangita ang edaran na nga kusinera.
Iya kini’ng gitug-anan sa nahitabo kaganina’ng kaadlawon nga naablihan niya ang ilang agawon nga naligo ug nakit-an ang kinatibuk-ang hubo nga lawas.
Gitambagan si Lanie sa kusinera nga magmatngon g’yud ug manuktok sa dili pa mosulod, ilabi na nga nagsiga ang suga didto sa sulod.
Pagkahapon na, nahiabot na si Nestor gikan sa iyang opisina. Sagad nga himuon sa kusinera mao ang pag-andam og coffee kang Nestor. “Timan-i g’yud Lanie nga inig-abot niana ni Nestor, muinom g’yud na og coffee. O, ihatod ni’ng coffee kaniya,” matud sa kusinera.
Kabalibaron unta si Lanie apan wala siya’y mahimo kay gisugo man siya sa edaran na nga kauban niya sa balay. Pagtangka ni Lanie sa kayda sa ikaduha’ng andana sa balay nga didto si Nestor, nakita niya nga nag-short pants ra ug naghukas sa iyang T-shirt si Nestor.
“Uy, ikaw man lagi ang mihatod sa coffee? Aw maayo hinuon kay aron magkasultihanay ta’g kadiyot,” matud ni Nestor ngadto kang Lanie. Gitutokan ni Nestor ang dalaga niya nga katabang.
“Ayaw laina pagsabot Lanie, modayeg lang ko nimo. Maanyag ka man ug dili angay’ng mosulod pagka katabang sa balay,” ni Nestor pa nga puwerte’ng nakatutok sa dalaga. Ingon sa mahilis si Lanie sa kauwaw. Gipalingkod ni Nestor si Lanie ug nagsultihanay sila. Wala makasabot si Lanie sa iyang gibati samtang nagtan-aw sa balhibuon nga dughan ni Nestor.
Milungtad og mga tunga sa oras ang ilang panagsultihanay. Nalipay si Lanie kay wala diay masuko kaniya si Nestor nga aksidente nga naablehan niya sa CR samtang naligo. (Sumpayan)
- Latest
