Truth advocate
Nag-abot karong buntaga sa lobby sa RTC Lapu-Lapu City ang duha ka managhigalang abogado. Managhigala sila kay wa gyud sila magkaatbang og kaso sulod sa sobra bayente anyos nilang panglaban. Ang nakapasuod nila kay pareho sila’g kaagi. Puro sila working students sa pagtungha og abogasiya. Puro sab sila clerk/typist/messenger sa usa ka abogado, sa estudyante pa.
Si Albert batabata ni Atty. Dante Manto. Si Charlie batabata ni Atty. Allan Paniging. Puro na patay ang ilang mga kanhi amo. Ug kadaghanan sa mga kaso sa ilang amo, napanunod nila. Maong sa pagpasar nila’g bar, bisi na dayon sila’g gunit og mga kaso.
Unya karon, puro na puti ug nipis ilang mga buhok. Wa gyud hinoon sila naopaw.
“Bay Bert. Wa gyud ka patina sa imong buhok bay?” ni Charlie, nga way laing nahunahunaang isulti aron lang pagtimbaya sa higala.
Nitupad og lingkod dapit sa wala sa higala, sa taas nga bangko sa lobby. Alas otso pa man. May 30 minutos pa silang tsikatsika.
“Wa lang bay. Kay di nako usbon ang gihatag sa Diyos” ni Albert. “Bilib ko nimo bay. Relihiyoso gyud gihapon ka” ni Charlie. “Imo wa sab gihapon ka patina?” ni Albert.
“Wa sab ko patina, bay” ni Charlie. “Ngano man?” ni Albert.
“Kay fraudulent misrepresentation. That is hiding the truth. I don’t want to hide the truth. As lawyers, we are supposed to be truth advocate” ni Charlie. Nakatawa si Albert.
“Nindot sab nang imong gisulti bay da. Ah kana na say akong itubag sa tanang mangutana nako, kun nganong wa ko patina og buhok” ni Albert.
Ug nitindog si Albert kay gisugat ang iyang kliyente nga niabot na. Nahibilin si Charlie nga naglingkod. Wa pa ang iyang kliyente. Nagyangoay lang sila. Pasabot nga see you later. (Katapusan)
- Latest
