Bugti sa kapakyasan

Gula 5

Wala masayod si Lanie unsay isulti niya sa iyang amo nga si Nestor nga nakit-an niya nga hubo ang lawas dihang kalit niya’ng gibuksan ang pansayan kaganinang kaadlawon.

“Sssori kaayo ha, wala nako tuyoa kaganina,” matud ni Lanie nga mao ra gayud ang naabot sa iyang huna-huna ang pagpangayo’g pasaylo. “Ayaw kadto’g huna-hunaa Lan, ako man ‘say sad-an niadto kay nakalimot ko pag-lock sa pultahan sa pagdinali-dali. May sayo man gud ko nga tambongan karon,”  tubag ni Nestor.

Nalipay kaayo si Lanie nga wala diay masuko ang iyang agawon kaniya. Milakaw si Nestor kay nagdali diay kini ug mao nga sayo kaayo nga naligo. Nakakuha’g leksyon si Lanie nga kinahanglan g’yud diay nga manuktok, ilabi na nga nagsiga ang suga sa sulod sa pansayan nga anaa usab ang kaligoan.

Human og panilhig ni Lanie sa palibot sa balay, naligo siya kay gisingot kaayo siya’g panilhig. Naghukas si Lanie sa iyang sapot ug nagpatungod dayon sa shower. Samtang siya nanabon sa iyang lawas, kalit lang misantop sa iyang kaisipan kadtong nakita niya kaganinang kaadlawon.

Wala siya makasabot sa iyang gibati nga nahanduraw niya ang hubo nga lawas ni Nestor. Bisan og mga 40 anyos na ang pangedaron ni Nestor, apan maskulado pa diay kaayo kini’g lawas.

Ang labaw nga wala makalimti ni Lanie mao kadtong butang nga iyang nakit-an nga dali kaayo nga gisap-ongan ni Nestor diha’ng gibuksan sa dalaga ang pultahan. Nahasol gayod si Lanie sa iyang nakita nga ingon sa miukiot pag-ayo sa iyang kaisipan.

Human niya’g kaligo, gitapis niya ang lapad niya nga tualya ug moadto siya sa iyang kuwarto sa silong ra sa balay. Ingon sa nanginit ang kalawasan ni Lanie. Karon pa masayod si Lanie nga ang babaye mobati usab diay og dili tiaw nga kalalim kun makakita og talan-awon sa usa ka lalaki.

Wala dayon magsul-ob og sapot si Lanie. Mihigda siya sa iyang higdaanan ug gitabon lang sa iyang lawas ang umog nga tualya. Gipiyong niya ang iyang mga mata ug takulahaw lang nga mihadla na usab sa iyang kaisipan ang nakita niya kaganina. (Sumpayan)