Bugti sa kapakyasan - Gula 4
Pagbalik ni Lanie sa iyang kuwarto, dali ra kaayo siya nga giganoy sa katulogon. Walay nakabalda sa iyang pagkatulog. Naanad si Lanie nga didto sa ila sa Medellin, tigsayo siya nga momata ug maghikay sa ilang makaon.
Apan may kusinera siya nga kauban. Alas kuwatro pa sa kaadlawon base sa relo diha sa iyang wala nga pulso. Nahuna-huna ni Lanie nga manglimpyo lang usa siya sa palibot sa balay aron inigmata sa iyang amo nga si Nestor limpyo na ang palibot.
Nakahuna-huna si Lanie nga mag-CR una. Nakabantay si Lanie nga nagsiga ang suga sa CR nga gituohan niya nga wala kini mapawong sa ilang pagpangatulog. Dali nga gibuksan ni Lanie ang pultahan ug puwerte niya nga igkinga dihang misugat sa iyang mga mata ang hubo nga lawas ni Nestor.
“Ay, sori kaayo,” matud ni Lanie nga midali-dali pagsirado sa pultahan. Nakalitan usab ug wala makatingog si Nestor. Midali-dali si Lanie pag-adto sa iyang kuwarto ug wala mahinultol unsay iyang himoon.
Gibati siya’g dili matukib nga kauwaw kay nakita gayud niya ang kinatibuk-ang lawas ni Nestor nga walay sapot. Naatol usab nga nag-atubang si Nestor sa pultahan sa iyang pag-abli samtang nagsigi og panabon ang iyang amo.
Kagawason dili si Lanie tungod sa kauwaw. Wala gayud tuyoa ni Lanie nga makit-an niya ang hubo nga lawas ni Nestor nga maligo. Karon pa makaamgo si Lanie nga komon diay ang ilang pansayan ug anaa sa silong mahimutang.
Dili unta gusto nga mogawas si Lanie sa iyang kuwarto apan kinahanglan na siya nga manglimpyo sa palibot. Nag-anam na og dan-ag ang kahayag. Napugos si Lanie sa paggawas sa iyang kuwarto.
Nakita niya ang kusinera nga didto na sa kusina nagsugod na pag-andam sa ilang pagkaon. Daghan kaayo’ng mga sagbot sa kilid sa balay ilawom sa dakong punoan sa santol. Paglingi ni Lanie, iyang nakita si Nestor nga nagbarog ug nagtan-aw kaniya. Miduko si Lanie tungod sa kauwaw. Giduol siya ni Nestor. (Sumpayan)
- Latest
