Isla Paraiso Gula-225

Ang nanuslok karon sa hunahuna ni sister Veronica kun nganong milayas man si Rey sa tambalanan. Unsa may hinungdan nga iya man kining gibuhat? Nakapangutana si sister Veronica sa iyang kaugalingon nga gigapos sa kalibog.

Nahiunlod si sister Veronica sa halawom nga paghinuktok. May gilikayan kaha si Rey mao nga milayas kini sa hospital? Ug kinsa man ang iyang gilikayan? Patay na si Col. Martin Villadar ug ingon man ang mga tulisan nga mga sakop niini. Luwas si Rey sa hospital. Apan nganong mikagiw man kini?

Unya, takulahaw lang, dihay lahing ideya nga misantop sa hunahuna ni sister Veronica. Wala siya masayod kun diin gikan ang maong ideya ug kun nganong miabot kini sa iyang hunahuna. Apan nakapangutana siya sa iyang kaugalingon kun dili ba kaha siya ang hinungdan kun nganong milayas si Rey sa tambalanan.

Nahatalunong si sister Veronica. Gibati niya karon nga guilty siya sa pagkawala ni Rey sa tambalanan. Karon mihugot ang iyang pagtuo nga siya maoy hinungdan sa paglayas niini sa hospital. Ug kini nakahatag kaniya’g dili tiaw nga kahasol ug kabalaka. Diyos ko, nakasangpit siya sa Makagagahom, ayaw intawon itugot nga may daotan nga mahitabo kang Rey. Ug wala tuyoa nga nakahilak siya.

Nahinumdom siya nga sa dihang iyang gipakigsultihan si Rey didto sa sulod sa tambalanan samtang siya nag-apong niini, wala gayod kini motubag kaniya. Igo lang kining mitutok kaniya. -- Sumpayan pa