Relo de pulso

Alas singko sa buntag. Human na’g kaligo si Charlie. Andam na siya sa iyang inadlaw nga hike. Nagsul-ob na siya’g sapatos guma. Nagsambilay siya’g T-shirt ilisan. Nagkawo na siya’g baseball cap. Gisulod niya’s bulsa iyang shades, para pag-hike balik sa agi. Gipasiklapan niya iyang relo de pulso ibabaw sa lamesita sa ilang sala. Gibiyaan niya. Aron di masubli ang hitabo.

Tulo ka tuig na nga tig-hike kada buntag si Charlie.Tungod sa iyang dayabitis. Iya untang pakuyogon si Riza iyang kapikas. Apan di mahimo. Kay duna siya’y sakit sa kasingkasing. Di puwede mahago. Mahibilin ra gyud siya’s balay kada buntag.

Duha ka oras ang hike ni Charlie. Gikan sa ilang balay sa Guadalupe ngadto sa Ayala Business Park. Bali’g upat ka kilometro ang gilay-on. Usa ka oras nga lakaw. Balik, laing usa ka oras. Alas siyete sa buntag iabot niya balik sa ilang balay.

Nakauyab si Charlie og babaye nga hiker. Buwag og bana si Chona. Nagpaila sab siya nga buwag sa asawa. Sukad si Charlie nakauyab, date sa kaadlawon na ilang nahimo. Dili na hike. Imbes mag-hike sila, manglingkod na lang sa ngitngit nga suok sa Ayala. Magsigi na la’g romansa. Tigdala na og relo si Charlie. Aron regular gihapon ang takna sa iyang pagpauli. Magsakay na lang siya. Aron di magduda iyang kapikas.

Apan usa ka buntag, human sa tulo ka bulan niyang sul-ob og relo mabuntag sa kada lakaw, giapas siyang Riza. Atol nga nag-agbay-agbay siyang Chona, gikablit siyang Riza. “Abi nako’g nag-hike ka tinuod! May ka-date man diay ka!” ni Riza. Puwerting kurata ni Charlie. Iya na lang gipasabot si Chona nga nagkauli na siya ug iyang asawa. Nipalayo na lang si Chona. Nangayo si Charlie’g pasaylo sa kapikas. Gipasaylo siya human sa usa ka semanang luhodluhod.

“Giunsa man nimo pagkasayod nga nakauyab ko’g hiker?” ni Charlie, dihang maayo na ang buot ni Riza.

“Hapit tulo ka tuig kang nag-hike nga di magdala og relo. Karong nilabay nga upat ka bulan, tigrelo na ka. Nagduda dayon ko nga duna kay hapithapiton. Gipasundan tika ni Lenlen atong maid. Dihang nagkaanam na mo ka-sweet ni Chona, ako na gyuy niapas nimo nga nagsakay,” ni Riza. Nakapanglingo si Charlie. Ug nanaad nga di na magrelo kun mag-hike pag-usab. (Katapusan)