Isla Paraiso

“Sister Veronica,” sa kapitan pa, “unsa nay nahitabo? Nakit-an na ba si Rey?”

“Wala gayod, Sir,” tubag ni sister Veronica nga masulob-on kaayo ang panagway. “Nalukop na’g suhid sa taga hospital ang tanang dapit sa tambalanan apan wala gayud nila makita si Rey.”

“My God,” napaak ni Capt. Benale ang iyang wait. “Migawas lang ko’g kadiyot aron pagpalit og pagkaon,” ni sister Veronica pa, “apan pagbalik ko wala na siya sa lawak nga iyang nahimutangan.”

“Ang gikahibudngan ko lang kun nganong gibuhat kini ni Corpuz,” sa kapitan pa. “Luwas man unta ang iyang kahimtang dinhi sa hospital.”

“Luya pa kaayo si Rey, Sir,” matud ni sister Veronica. Tingalig unsay mahitabo kaniya.”

“Relaks lang, sister Veronica,” ni Capt. Benale. “Karon dayon palihukon ko ang akong mga tawo. Ipapangita ko si Corpuz.”

Dihadiha gimandoan ni Capt. Benale sa pagpangita kang Rey ang iyang mga tawo.

“Lukpa ninyo’g suhid ang mga dapit nga posible niyang adtoan,” tugon ni Capt. Benale sa iyang mga tawo nga gipangulohan ni Corporal Benturada.

Sa dihang nakabiya na ang mga sakop ni Capt. Benale sa tambalanan, ang kapitan nananghid sa madre nga mobalik na siya sa iyang buhatan. Paaboton niya ang report sa iyang mga tawo nga iyang gisugo sa pagpangita kang Rey. -- Sumpayan pa