Pitaka nga kinit-an

Gula 6

“Way swerte ang among panagtipon ug sa amahan niini'ng akong anak kay gitakda na unta nga magminyo mi, apan natintal man siya og laing babaye dihang didto pa siya sa abroad," saysay ni Katryn sa iyang kaagi.

Nasayran ni Andro nga naminyo og laing babaye ang kanhi boyfriend ni Katryn apan gidemalas kay naalkanse ang negosyo ug nahimo na karon nga makalolooy. "Wala g'yud tingali ko'y swerte sa gugma Andro kay bisan sa akong kamatinud-anon, nakaako pa sila pagbudhi nako," ni Katryn.

Sagol kaluoy ug kaibog ang gibati ni Andro ngadto kang Katryn. "Daghan pa nga mga lalaki ang mahigugma kanimo sa matuod Katryn… ug usa na ko niana kun imong tugotan," puno sa kaaghop ang tingog ni Andro nga militok sa mao nga mga pulong. Nakakatawa si Katryn nga nakadungog. "Bugal-bugalon ka man diay Andro, dugangan g'yud nimo ang akong kasubo da," ni Katryn pa nga nagpahiyom. "Midayeg lang ko nimo kay bisan og ang akong pitaka adunay sulod nga kuwarta, imo g'yud nga gitug-an ug gipangita ko nga maoy tag-iya," dugang pa ni Katryn.

Wala na lang motingog pa si Andro. Nangaon sila ug pagkahuman, nagsultihanay sa sala. Hapit na tunga'ng gabii nga mibiya si Andro sa balay ni Katryn. Mingaw na sa gawas. "Bye Kat," matud ni Andro sa dayon niya nga sakay sa taksi.

Samtang nagdagan pa ang taksi paingon sa gipuy-an ni Andro sa Barangay Tejero, nakadawat siya'g text message gikan ni Katryn. Nagpasalamat kini sa iyang pagbisita. Nalipay na lang kaayo si Andro nga natug-anan niya si Katryn sa iyang gibati.

Milabay ang mga adlaw, semana ug mga buwan. Misamot ang panagsuod nila ni Katryn.  Giimbitar si Andro og party sa iyang kauban sa opisina. Nakahuna-huna siya nga i-uban niya si Katryn mao nga iya kini nga gipadad-an og text message.

Wala mobalibad si Katryn. "Sige, oki kaayo para magkauban na 'sab ta kay miss na tika Andro," ni Katryn. Sweet kaayo ang mao nga mga pulong nga nadawat ni Andro ug nakapasamot kini sa iyang gugma kang Katryn.

"Sige, anhaon tika human sa akong trabaho love," bawos text ni Andro. Gituyo niya nga gitawag og love si Katryn bisan wala pa siya sugta aron pagsukod sa iyang reaksyon. (Sumpayan)