Pitaka nga kinit-an - Gula 4 “Unsa

“Unsa diay imong ngalan?” gipangutana si Andro  ni Katryn. Mikuot si Andro sa iyang pitaka ug may gikuha nga usa ka calling card, dayon gitunol niya kini ngadto kang Katryn.

Mapahiyumon kaayo si Katryn nga midawat sa calling card. “Ah, ikaw diay Andro. Nice meeting you Andro,” matud ni Katryn. Gitutokan ni Katryn si Andro, mora’g nasabot sa ulitawo nga gisuta niini ang iyang pagkatawo.

“Gusto unta ko nga mohatag nimo og ganti kay napunitan man nimo ang akong pitaka apan maikog ko kay kuwartahan ka man,” matud ni Katryn. Abtik kaayo nga nakapamalibad si Andro nga dili siya kuwartahan ug ordinaryo ra siya nga trabahante.

Apan gitataw ni Andro ngadto ni Katryn nga dili siya modawat og ganti. “Igo na kanako nga nagkaila ug nagkahigala kita Katryn,” matud ni Andro. Bisan og milutaw gihapon ang pagka seksi ni Katryn, apan nagtuo g’yud si Andro nga minyo na ang babaye.

“Single ka pa ba Katryn?” gisukna ni Andro ang bag-o niya’ng higala. “No, married na ko and I have one child, but wala na mi magtipon ug ang akong husband nga tua sa abroad nagtrabaho. Siya ang una nga nangita’g lain, foreigner,” matud ni Katryn.

Gisaysayan si Andro ni Katryn nga ang iyang bana magpadad-anan lang kaniya og kuwarta mata’g buwan sa panggasto sa ilang anak. Apan sanglit tua sa abrod nagtrabaho, dagko ang ipadala niini nga kantidad.

May tindahan si Katryn nga sari-sari sa ilang dapit sa Labangon ug mao nga miadto siya sa grocery kaganina aron mangompra unta, apan nahulog ang iyang pitaka ug napunitan ni Andro. “Bisita unya sa akong balay Andro aron makakita ka sa akong tindahan,” dapit ni Katryn.

Wala magdugay ang ilang panaghinabi kay aduna pa’y tambongan nga miting si Andro. Wala niya tug-ani si Katryn nga konsehal siya sa ilang barangay. Ang iyang pagpaila-ila sa kaugalingon mao nga ordinaryo ra siya nga trabahante.

Subsob na ang pagbayloay nila og mga text messages. Sabado sa gabii, mi-text kang Andro si Katryn ug nangimbitar pag-usab nga paadtuon siya sa gipuy-an niini sa Labangon. (Sumpayan)