Unos sa kapalaran

Gula 5

Wala makapugong sila si Maribel ug Ernest sa gikusgon sa sulog sa ilang mga pagbati  taliwala sa mainiton nila nga pagparayganay. Gitagay nila ang talagsaong kalipay sulod sa cottage. “Wala ka ba magmahay sa nahitabo kanato Mar?” gisukna ni Ernest si Maribel.

“Wala man,” mubo nga tubag ni Maribel apan naklaro ni Ernest nga diha sa panagway sa iyang girlfriend ang anino sa kabalaka. Nasabot ni Ernest nga nabalaka si Maribel kay daghan na nga mga panghitabo nga talikdan na sa lalaki ang babaye kun makuha na ang ilang katuyoan.

Gisaaran ni Ernest ang dalaga nga dili gayud mahitabo nga maglimbong siya sa ilang relasyon. Nanglabay pa ang mga adlaw sa malipayon nila nga panag-uban. Ang nahitabo kanila ni Maribel ug Ernest didto sa cottage sa beach resort nasundan pa sa laing mga higayon.

“Gikuyawan baya ko Ern kay basin og moabot ang higayon nga mamunga ang atong gihimo,” mahingawaon nga tingog ni Maribel samtang nagparayeg ni Ernest samtang sila nanuroy sa public plaza sa Davao.

Wala dayon motubag si Ernest. Ingon sa aduna kini gihuna-huna. “Buyno, mosugot ka ba kun magminyo na ta?” giingnan ni Ernest si Maribel. “Ikaw gud, kun andam ka na,” dali nga tubag ni Maribel nga padayong miparayeg sa iyang boyfriend.

Tuod man, nananghid sila si Ernest ug Maribel sa iyang mga ginikanan sa plano nga sila magminyo na. Wala’y pagsupak ang mga ginikanan sa dalaga mao nga pagka sunod adlaw, milarga si Ernest paingon sa dakbayan sa Sugbo aron pagkuha sa iyang mga ginikanan.

Kanunay gihapon nga mag-teksanay sila si Maribel ug Ernest. Gipahibalo ni Ernest ang iyang girlfriend nga muabot sila sa Davao ini’g ka Domingo. Naghinam-hinam na si Maribel. Nahuna-huna ni Maribel nga wala gayud siya masayop pagtugyan sa iyang kaugalingon kang Ernest kay matinud-anon kini sa iyang gugma kaniya.

Domingo sa buntag, nakadawat og text message si Maribel nga modunggo sa pantalan sa Davao ang gisakyang barko nila ni Ernest ug sa iyang mga ginikanan. Nakahukom siya nga magpaabot na lang sa balay.

Nagkalingaw si Maribel pagpaminaw og music sa kinaham niya nga FM station. Takulahaw lang adunay flash report nga may nabangga nga sakyanan paingon sa dapit nila ni Maribel ug adunay nangamatay.  (Sumpayan)