Unos sa kapalaran - Gula 4

Mapanagan-on kaayo si Ernest nga moipon pagpahuway sa cottage uban ni Maribel sa kabalaka nga magtuo unya ang iyang girlfriend nga mapahimuslanon siya nga pagkatawo.

Apan ingon sa siya na ang gihagit ni Maribel niini’ng higayona aron mopahuway sulod sa cottage nga sila ra’ng duha. Nahuna-huna man gud ni Ernest nga usa ra man ka higdaanan ang anaa sa cottage. Hinuon, dunay nipis kaayo nga lingkoranan nga hinimo sa tabla.

Nakahuna-huna si Ernest nga komedyahan niya si Maribel. “Mahadlok man gud ko nga kun mag-uban ta sa pagpahuway basin og dili unya ko makapugong sa kaugalingon,” iyang giingnan si Maribel. Igo lang mipahiyom ang dalaga.

Mihigda si Maribel sa ngilit sa kama dapit sa bung-bong aron may igo pa nga luna si Ernest sa pikas nga bahin sa higdaanan. Daku kaayo ang tinguha ni Ernest nga paraygan unta niya ang iyang girlfriend apan giabot g’yud siya’g kataha.

Gipiyong ni Maribel ang iyang mga mata apan nagtakilid kini paingon kang Ernest. Samtang nagpiyong si Maribel, gitagbaw ni Ernest ang pagsud-ong sa iyang kaanyag. Nagduhiraw ang iyang huna-huna. Sa huna-huna ni Ernest nga nindot na g’yud kaayo nga paraygan si Maribel.

Samtang walay pumamilok si Ernest nga nagsud-ong sa panagway ni Maribel, kalit lang gibuka sa dalaga ang iyang mga mata ug nasakpan niya sa akto ang iyang boyfriend nga puwerte’ng nakatutok kaniya.

“Sakpan ka! Gisigihan ko nimo’g tutok mao nga wala ko makatulog,” matud ni Maribel nga nagngisi. Nahakatawa  na lang ‘sab si Ernest. Kadto maoy naghatag og giya ni Ernest nga paraygan niya ang dalaga.

Wala masayop si Ernest, nagpaabot ra g’yud si Maribel nga iyang paraygan. Nakigtigi ang dalaga sa pakigparayganay kang Ernest. Tugob sa kalipay si Ernest nga walay hunong sa pagparayeg sa iyang girlfriend.

Hangtod nga sa tanto nila nga pagparayganay, nagsugnib kini og talagsaong kainit ug pagbati sa ilang lawas. Daw dili na nila kapugngan nga anam-anam na sila nga gianod sa sulog sa kalipay. “Mar, I love you,” hagawhaw ni Ernest kang Maribel. “I love you too Ern.”

May gihunghong si Ernest ngadto kang Maribel. Wala na motingog pa si Maribel ug padayon ang ilang pagdimdim sa matam-is nga gugma. (Sumpayan)