Mangulata

Dear Tita Salie,

Hello! Just call me Marie, 25 years of age, duna koy 1 ka anak sa akong pagkadalaga ug buntis ko karon niining akong ka-live-in.

Mahal kaayo nako kining akong ka-live in karon kaso lang dili ko kasabot niya. Kanunay siyang moingon nako nga love kuno ko niya apan kun  mag-away gani mi iya kong kulatahon. Gaan kaayo siya og kamot ug dali ra kaayo siya makadapat nako. Permi pa kong bungatan sa mga pulong sa pagpakigbulag. Kun dili pa lang ko buntis karon sa akong anak dugay na gyud nakong gidawat ang iyang hagit sa pagpakigbulag.

Apan sa akong kahimtang karon nga usa ka buntis maglisod gyud ko pagdesisyon alang sa akong kaugalingon. Magsige pa siya og ingon nga iya kunong minyoan ang iyang uyab sa una. Sakitan kaayo ko sa iyang ipanulti. Nahadlok ko, Tita, kay tingali og maapektohan ang akong gisabak sa akong pagsige og kaguol.

Naglibog na gyud ko kun unsay angayan nakong buhaton. Naglisod na gyud ko sa akong kinabuhi. Palihog tabangi ko ug pasabta ko sa akong buhaton. Thank you and more power.

* * *

Hello Marie ug kumosta?

Dili gyud unta angayan kanimo ang kanunay nga maguol tungod kay anaay angel sa imong sabakan. Matud sa pagtuon sa Psychology, maapektohan ang bata nga anaa sa tiyan sa inahan sa gibati sa iyang mama. Mas maayo gyud unta nga kanunay kang malipayon aron magtubo usab ang bata sa imong tiyan nga at home siya ug siyempre happy usab ang bata ug makakuha siya og mga positive nga mga attitude gikan sa iyang inahan.

Puwede nimo siyang isumbong o ipa-blotter sa panahon nga dagmalan ka sa imong bana. Magpalaban ka sa atong balaud. Kay duna nay balaud nga gilatid aron maprotektahan ang atong  kabataan ug alang kanatong  kababayen-an.

Kun ugaling dili na gyud nimo makaya pa ang imong bana mas maayo pa siguro kun mopauli ka sa inyoha, kay sigurado ko nga atimanon ka gyud sa imong pamilya. Ayaw pag-antos nianang imong bana nga wala maghunahuna sa imong kalipay. Nganong dili kaha nimo suwayan nga mopauli sa inyoha. Aron usab imong masayran kun magpakabana pa ba ang imong bana. -- Tita Salie