Isla Paraiso - Gula 207

“Kuwanggol ka, Corpuz!” Misinghag si Col. Villadar. Sa kalisod sa atong panahon karon ug sa kagamay sa suweldo natong mga polis, wala’y polis nga dili makahunahuna pagdangop sa daotang buhat.”

“Dili tanang polis ang sama kanimo, Koronel!”

“Gigamit ko lang ang akong utok, Corpuz!”

“Dili ka angay sa nahuptan mong katungdanan, Col. Villadar! Wala ika’y kalainan sa usa ka mabangis nga kriminal!”

Wala na motubay si Col. Villadar sa pagpakigsulti kang Rey. Ang masipang mga buto sa pusil maoy iyang gitubag kang Rey. Miipli si Rey sa haligi ug dihang milunga na ang koronel pagpusil kaniya, mibalos siya pagpabuto.

Unya kalit lang nahalingi si Rey sa iyang luyo. Ug mao gayoy misugat sa iyang mga mata ang usa ka kaaway nga andam na sa pagpusil kaniya. Midali gilayon siya pagligid halos dungan sa paglanog sa masipang buto gikan sa armas sa kaaway.

Midali pagbarog si Rey. Mihilom siya pagpaduol sa gitagoan ni Col. Villadar kaganina. Mainampingon siya sa iyang mga lihok.

Apan iyang nasuta nga wala na didto si Col. Villadar. Wala siya makamatikod sa paggawas sa koronel sa gitagoan niini. Nalipat siya gumikan niadtong kaaway nga buot molipot kaniya kaganina.

Mipadayon na lang si Rey sa pagpangita kang sister Veronica. Kinahanglan nga maluwas na niya ang madre. --Sumpayan pa