Bar girl

Gula 5

Miuyon si Delfin sa gihangyo kaniya ni Leny. Tuod, gipaila-ila ni Leny si Delfin ngadto sa iyang mga kauban sa bar nga  iyang boyfriend. Aron motuo g’yud ang iyang mga kauban nga boyfriend niya si Delfin, mata’g karon ug unya mo-loving si Leny sa ulitawo. Sa hilom gikalipay ni Delfin ang ilang drama ni Leny. Menos ra og kustomer karong gabhiona mao nga nakahigayon si Leny sa pagbiya lang sa cashiers booth ug gitugyan ra niya sa iyang kauban ang pag-atiman sa kaha.

“Kanindot sa akong sitwasyon Len uy, kaayo ra unta og madayon nga mahimo g’yud ko nimo nga boyfriend,” hagawhaw ni Delfin ngadto sa bar girl. Mipahiyom si Leny ug mitutok ni Delfin. “Kinsa’y nasayod? Basin diay,” matud ni Leny. Panahon nga magdikit ang masig ka lawas nila ni Leny ug Delfin, ingon sa dili mahimutang ang ulitawo. Layo kaayo ang gilabyogan sa iyang kaisipan ug gihanduraw niya ang sitwasyon nga sila’ng duha nagtupad sa pagpanghigda nga sila ra.

Taud-taud, miabot ang anak sa tag-iya sa bar nga si Wendel. Mideritso kini sa cashiers booth nga wala makakita kang Leny nga naglingkod sa duol nga lamesa uban ni Delfin. “Absent si Leny? Wala siya motunga?”

Nanghilom ang mga waiter ug kadto’ng babaye nga mipuli ni Leny sa kahera. Didto sila mitutok ni Leny sa lamesa nga nahimutangan niini ug ingon sa gusto nila nga si Leny maoy mopakita kang Wendel nga kauban ang iyang boyfriend. Wala sila masayop kay mitindog si Leny gikan sa iyang gilingkoran ug miduol ni Wendel. “Good evening boss Wendel. Nagpapuli usa ko  ni Alma kay gi-entertain usa nako kadiyot ang akong boyfriend nga mibisita nako,” matud ni Leny.

Nabasa ni Leny sa panagway ni Wendel nga ingon sa gibati kini og kasuko. Wala motingog ug igo lang nga mitan-aw sa lamesa nga didto si Delfin naglingkod. “Kun mao, absent na lang karon kay may bisita ka man kaha, pwede ra man si Alma na la’y mag-cashier,” ni Wendel pa.

Wala makatingog si Leny. Karon klaro na kaayo nga nasuko si Wendel nga adunay mibisita kaniya. Nasakitan ‘sab si Leny sa gipakita’ng pagtagad ni Wendel. Wala niya kini himoa sa uban nga mga dancer nga apason sa  ilang mga boyfriend. (Sumpayan)