Isla Paraiso - Gula 204

Paghigawas ni Rey gikan sa ilawom sa maong awto, maoy misugat kaniya ang nagpungasing mga bala gikan sa kaaway nga nagbitbit og grenade launcher. Midiritso siya pagligid ngadto sa usa ka dakong haligi aron paglikay sa mga tingga sa kamatayon nga bangis kaayong migukod kaniya.

Paglunga sa butobuto, misantop gilayon sa hunahuna ni Rey nga malagmit tirahan na usab siya sa kaaway og  rifle grenade. Busa wala siya mag-usik og higayon.

Mikalit siya paggawas sa iyang gipasalipdan ug gipusil ang kaaway sa wala pa kini makabuhi sa makalilisang bala sa grenade launcher. Ang kaaway naigo sa iyang pagpusil. Nabuhian niini ang gigunitang armas nga taas og kalibre halos dungan sa pagkahagba niini sa salog.

Gidali pagpunit ni Rey ang hinagiban sa kaaway. Karon nga nakagunit na siya sa grenade launcher, ingon sa misamot ang iyang kaisog.

Si SPO3 Rey Corpuz nagpadayon sa pagpakigsangka sa mga kaaway. Ang iyang walang kamot maoy nagunit sa Uzi samtang ang tuong kamot maoy nagunit sa M-203. Nanglit-ad ang mga kaaway nga ingon sa gisilhig sa duha ka matang sa hinagiban nga iyang gigamit sa pagpakigsangka.

Ang mga tagoanan sa kaaway nga ingon sa lisod padul-an iyang gipaulbo pinaagi sa rifle grenade.  -- Sumpayan pa