Romansa ug pag-eskuwela - Gula 7

Kahilom ang mihari kanila ni Abel ug Rowena dihang nakabiya na kanila ang maguwang-lalaki sa dalaga. Igo lang sila nga nagtinutokay. Wala’y pulong nga nalibkas sa ilang mga ngabil.

Apan miabot sa huna-huna ni Abel nga dili siya magpadaog sa kauwaw ni Rowena. “Pwede ba og masayran nako Wen kun may paglaom ba ako sa akong gihalad nga gugma kanimo?” matud ni Abel.

Pahiyom ra’y gitubag ni Rowena sa ulitawo. Taud-taud, mitutok si Rowena kang Abel. “Tininuod ba gud ang imong pagpanguyab nako Abel? Basin og gibinuangan lang ko nimo,” sa dalaga pa.

Halos gigamit ni Abel ang tanan, apil na ang Bathala, aron lang dili magduda kaniya si Rowena. “Kun mahimo ko pa lang nga buksan ang akong dughan ug ipakita ko kanimo ang akong kasing-kasing Wen, tingali masuta mo gayud ang katiunay sa akong gugma kanimo.”

Nakaagik-ik na usab pagkatawa si Rowena nga nakadungog sa mga garay ni Abel. “Sige-sige, motuo na ko nimo, ayaw na lang gamita pa ang Bathala. Sige, gisugot na tika,” ni Rowena pa nga nagngisi.

Sangko tuod sa langit ang kalipay nga gibati ni Abel nga wala siya pakyasa ni Rowena. Malipayon ang pagbakasyon ni Abel sa ilang dapit ni Rowena. Mipauli na si Abel sa ilang dapit bawon ang gugma sa dalaga. Nanglabay ang mga adlaw, semana, buwan ug tuig. Dungan   nga migradwar si Abel ug Rowena. “Wen, daku kaayo ang akong pagpasalamat kanimo kay kun wala ka pa, daghang mga tingkaon nga napasmo na unta ko,” pasalamat ni Abel sa iyang girlfriend.

Si Abel ang Magna Cum Laude sa ilang klase ug Cum Laude usab si Rowena.  Wala malilong sa mga ginikanan ni Rowena nga si Abel maoy inspirasyon sa ilang anak sa pagtuon.

Gitabangan si Abel sa mga ginikanan ni Rowena nga maka-take og board examination.  Wala’y hunong ang ilang swerte, dungan sila nga mipasar sa Engineering Licensure Examination.

“Karon nga hingpit na kita nga engineer, tingali mabuhi ko na ikaw isip akong asawa. Pwede ba og may ihangyo ko nimo?” maguwang sa hagawhaw ang tingog ni Abel.

Kalit giluknit ni Rowena ang kilid ni Abel. “Sigi gud, asa man ta? Momabdos gani ko makapangasawa ka g’yud og ahat,” matud ni Rowena nga nagngisi. Gipatikan og hawok ni Abel ang mga ngabil ni Rowena.  Misakay dayon sila’g taksi paingon sa mabugnaw’ng lawak. (Kataposan)