Usa ka father’s day reunion

Ate, angay kang masayod nga obligasyon sa anak ang pag-atiman sa ginikanan kun masakit o matiguwang na!” ni Dahlia, usa ka Interior Designer ngadto sa iyang maguwang nga si Daphne, usa ka Call Center Agent.

Nag-abut silang duha sa balay sa ilang ginikanan diin nagsaulog sila og Father’ Day. Si Dahlia ang namalit og linuto na daang pagkaon para sa ilang Father’s Day reunion, pasidungog sa ilang amahan nga si Celso, usa ka CPA nga luyahon na tungod sa dayabitis. Mas grabe hinoon ilang Mama Nova nga masakiton og kasingkasing.

Human na sila’g paniudto ug nag-tsika-tsika na sa sala sa maong balay. Ang bana ug mga anak nilang Dahlia ug Daphne, tua sa playground sa lawn sa residensiya sa ilang ginikanan. Naglingaw sa mga bata. Gipahimudsan ni Dahlia ang higayon.  Aron di kadungog ilang mga bana. Kay si Dahlia ra ang nagsuporta og kuwarta sa ilang ginikanan. Si Daphne maglihaylihay kun teksan ni Dahlia nga pahatagon og kuwarta sa ginikanan.

“Akong bana man god ang naggunit sa among kuwarta. Tihik kaayo! Maglisod man gani ko’g pangayo’g pamelete” ni Daphne. Niping-it.

“Pasabta na imong bana oy! Wa ka maghunahuna? Sa gagmay pa ta? Nagtungha ta gikan sa kindergarten, elementarya ug hayskul. Hatud kuha ta’g sakyanan. Si papa nga himsog pa, maoy atong drayber. Si mama nga himsog pa, atong yaya. Sa kolehiyo di na man ta ganaha’g hatud kuha. Higayon na nga kitang mga anak, mao na say moatiman sa atong ginikanan nga naglisod na’s kuwarta tungod sa tambal gimintin ug di na katrabaho og tarong tungod sa ilang sakit,” ni Dahlia.

Naminaw lang ang mga retiradong ginikanan sa duha ka anak babaye. Nagtinan-away sila. Nagpahiyomay. Nakaamgo nga dili gyud magpareho ang kinaiya sa mga anak. Bisan og pareho ang ilang pagmatoto sa ginikanan. May dawo ug way kaluoy sa ginikanan.

Duna say maloloy-on ug manggihatagon sama ni Dahlia. Naghatag si Dahlia og binulan nga allowance para sa tambal sa iyang papa ug mama. Si Daphne, nag-agap lang gihapon kun unsay iyang makuha sa iyang mga ginikanan. (Katapusan)