Nikilab lang

Karsada ni Bay. Agianan ni sa tanan. Dili ni ang angay’ng lugar diin mangita ka’g kaaway,” pasabot sa hamtong lalaki nga nagmaneho sa Isuzu Crosswind nga puti. Niurong ang Isuzu sa intersection sa Bataan Street ug dalan Andres Abellana sa Guadalupe. Modesilya unta gikan sa Andres Abellana ang Isuzu ngadto sa Bataan ning sayong kahaponon.

Unya si Rudy nagsubay sa Andres Abellana padulong sa M. Velez. Puwerting tanusa nga nakapadagan si Rudy sa habalhabal nga may usa ka pasahero. Sutoy man lang iyang motorsiklo gikan sa kasadpang tumoy sa Andres Abellana ngadto sa dalan M. Velez. Way minorminor pag-abot sa  intersection sa Bataan Street.

Pulgada lay kulang nga magka-iganay ang motorsiklo ug SUV. Niurong si Rudy sa unahan ug gitulisok niya ang guwangon na nga drayber sa Isuzu. Nanaug na lang iyang pasahero kay duol na man sa eskina M. Velez.

Nangluspad si Rudy sa kakulba ug kalagot nga hapit gyud sila magka-ig-anay ug gibasol niya ang drayber sa Isuzu. Batasan ni Rudy nga tigpasirit og padagan sa tanos nga dalang Abellana. Apan karong kabag-ohan, dunay duha ka karatula nga nagbarog sa may interseksiyon sa mga dalang Bataan ug Abellana.

“Akong tambag nimo Bay, pagminorminor sab og magdulong ka duol sa intersection” sa tiguwang drayber.

“Nganong magbuot man ka. Nga through street man ang akong giagian. Ikaw mo-left turn man lang” tubag ni Rudy.

“Through street lagi ka. Unya kusog kaayo imong dagan. Ako tingale ang sad-an kay nag-aginod ko pawala gikan sa Abellana padulong sa Bataan. Apan hibaw-i, wa gyud tika makita sa layo pa. Kay nasalipdan imong motorsiklo sa mga karatula. Unya kusog kaayo imong dagan. Maayo na lang kay naka-brake pa gyud ko pagkilab nimo. Nikilab ka lang tungod sa imong kakusog. Mahimong sad-an ko kay wa ko kakita nimo sa layo pa. Apan mabasol ba ko nga nasalipdan man ka’s karatula? Maghunahuna sab gyud ka’g minor sa may intersection. Sad-an tingale ko kun nagka-ig-anay pa ta. Apan ikaw, asa man kaha ka padulong kun nakaig-anay pa ta, sa imong kakusog?” sa tiguwang.

Diha nahinuklog si Rudy. Kadaghan na ni nahitabo niya nga hapit siya madasmagi o makadasmag duol sa  intersection kay tigpakusog siya’s motorsiklo nga way panagana. Nitalikod siya. Nilakaw na lang siya nga way tingogtingog. Duna tingale sad-an sa disgrasya. Apan bisa’g di siya sad-an, asa man siya padulong? Sa ospital o menteryo? Nakahukom siya nga managana sa iyang pinadaganan og habalhabal. Wa pa ra ba ni niya maimpas sa financing iyang habalhabal. Basi’g siya hinooy mauna og kaimpas.

Ug gilingi na lang niya ang Isuzu nga wa pa gyud nipadagan tungod sa kakulba sa drayber.

“Salamat na lang Noy sa imong pag-brake,” ni Rudy.

“Salamat sab nga nisabot ra ka,” sa tiguwang. Niyango ug nipadagan og hinay. (Katapusan)