Romansa ug pag-eskuwela

Gula 3

Dali ra kaayo nga nagkasuod sila si Abel ug Rowena. Pinaagi ni Rowena nasulbad-sulbad ang problema ni Abel kabahin sa iyang pagkaon kay pagahatagan na man siya sa dalaga og makaon.

Naluoy kaayo si Rowena kang Abel diha nga gisaysayan siya sa ulitawo sa ilang kalisod ug maoy hinungdan nga kanunay lang maulahi ang pagpadala og kwarta sa iyang mga ginikanan alang sa iyang pagtungha.

Nalipay kaayo si Rowena kay dako siya og grado nga nakuha sa ilang examination. Nahuna-huna ni Rowena nga kun wala pa motabang si Abel sa pagpasabot kaniya sa ilang leksyon tingali gamay ra ang iyang grado.

Gipasigarbo ni Rowena si Abel ngadto sa iyang igsuon nga bisan og nag-antos kini sa kalisod apan naninguha g’yud kini sa pagtungha ug kanunay pa nga top sa ilang klase.

Miabot ang bakasyon, nag-iyahay lang pagpamauli ang mga barkada ni Abel. Naghinuktok si Abel ug layo kaayo og panglantaw diha nga giduol siya ni Rowena.

Gisukna siya sa dalaga kun aduna ba’y problema. Diha pa nahibaw-an sa dalaga nga naproblema ang iyang amigo kay ang tag-iya sa apartment midemanda nga mangayo daan og advance nga abangan aron dili kini modawat og laing papuy-on sa ilang kuwarto.

“Dili makasabot si Nang Candida nga naglisod man gani ko’g pangita og pamplete pauli sa among probinsya, unya pabayron na hinuon ko niya’g advance nga abang,” matud ni Abel sa subo kaayo nga tingog.

Nalukmay g’yud kaayo si Rowena sa sitwasyon ni Abel. “Sige, akong ingnon si manoy Lester nga kami lang usa ang mobayad sa imong advance rental Abel, unya ayaw kabalaka nianang plete paingon sa inyong probinsya, ako ra’y bahala ana,” matud sa dalaga.

Daw gibayaw sa kalipay si Abel nga nakadungog sa gisulti ni Rowena ug iya kini nga nagakos. Milugmaw ang luha sa mga mata ni Abel. “Sori kaayo Wen ha nga nagakos tika. Tungod lang kadto sa naghingapin nako nga kalipay,” matud ni Abel. “Walay problema Abel. Dako ko og utang kabubut-on nimo nga taas ang akong grado.. manuroy ta kay ako ra’y bahala,” giingnan ni Rowena si Abel. (Sumpayan)