Romansa ug pag-eskuwela
Gula 2
Misulod si Rowena sa kwarto nga giestahan ni Abel ug sa laing mga tinun-an. Una nga higayon nga namarayeg ang dalaga kang Abel nga pasabton siya sa ilang leksyon nga wala kaayo niya hisabti.
Bisan tuod og dili mahinultol ug kuwang pa gayud og pagkaon si Abel apan nagpabilin ang iyang pagka utokan. Wala gani siya’y mga libro, dili sama sa iyang mga kaklase nga hitsas sa mga libro, apan nasabtan ra gihapon ni Abel ang leksyon.
Nahinangop kaayo si Rowena nga gitabangan siya ni Abel nga masabtan niya ang gileksyon kanila sa ilang instructor. Examination na nila pagka ugma mao nga nagtuon gayud si Rowena sa ilang leksyon.
“Biliba nako nimo Abel uy, wala ka man la’y basa-basa og libro pero makamao ka man dayon sa gileksyon ni Sir,†matud ni Rowena. Mibalik si Rowena sa iyang kuwarto sa pikas apan taud-taud mibalik kini nga nagdala og makaon para kang Abel.
“Kaon usa Abel kay nakadungog ra ba ko nga usahay matulog ka lang nga dili makakaon,†mahingawaon kaayo ang tingog ni Rowena ngadto ni Abel. Miduko si Abel kay nauwaw siya kang Rowena.
“Sige na Abel, kaon na. Palitan tika og softdrinks para makabawos ko kay imo ra ba ko’ng gitudloan,†matud ni Rowena nga nagngisi. Mikaon si Abel sa gidala nga pagkaon ni Rowena diha nga nakabiya na ang dalaga.
Pagbalik ni Rowena dala na niini ang bugnaw kaayo nga softdrinks. “Maikog na kaayo ko nimo Wen. Pasensya lang ha, unsaon nga dugay man nga nakapadala og suporta sila si Nanay sa probinsya, apiki tingali kaayo,†kalma kaayo ang tono sa sinultihan ni Abel.
Nalipay si Abel kay natambalan tawon ang iyang kagutom. Nagtuo siya nga mapalta na usab ang iyang pagkaon nianang buntaga. Nakakaon tawon si Abel sa iyang pamahaw bisan og hapit na alas 10 sa buntag.
Pagka gabii, nagtoon si Abel sa iyang notes. Nakabantay siya nga mili-li si Rowena kaniya gikan sa gawas. Taud-taud, nangabot ang mga barkada ni Abel, apil na si Lester nga igsuon ni Rowena.
Misulod si Rowena. “Duna pa ma’y subra nga pagkaon didto sa kuwarto Kuya Lester, kuhaon nako to ha kay basin wala na ‘sab makapanihapon kini si Abel. Nagpatudlo ra ba ko niya ganina sa among leksyon,†giingnan ni Rowena ang iyang igsuon. (Sumpayan)
- Latest
