Magpabungol-bungol

Dear Tita Salie,

Have a nice day. I am Belia, an avid reader of your column. I am only 19 years of age dili pa minyo apan duna ko’y live-in partner nga maoy kanunay makahasol sa akong kinabuhi.

Maglagot man gud ko niya, Tita Salie, ug hapit na gyud ko makahunahuna nga ilisan siya kay dili man mi magkasinabot ug kanunay lang mi nga mag-away.

24 years old na siya apan mora lang gihapon og bata. Magsige lang og duwa’g basketball gikan sa buntag hangtod sa hapon bisan wala’y kaonkaon. Unya kun tawgon magpabungol-bungol lang.

Usahay kun kasab-an ko sa akong mama motabang pud siya, iya kong iduot. Buotan man unta siya apan usahay mogawas ang kasalbahis. Unsaon man nako ni siya, Tita? Palihog pasabta ko. Daghang salamat. More power.

* * *

Good day,

Makita nato sa imong partner nga bisan sa iyang pangidaron immature lang gihapon siya ug anaa pa gyud kaniya ang hunahuna sa linghod nga tawo. Daw sama siya sa usa ka high school nga estudyante nga adik kaayo sa basketball ug bisan naglagiting ang kainit ganahan lang gihapon nga magduwa-duwa.

Kinahanglan nimo siya pakig-estoryahan kanunay mahitungod sa mga seryosong butang nga adunay kalabotan sa inyong responsibilidad isip usa ka pamilya o magtiayon. Lakip na niini ang inyong mga plano ug diskarte sa kinabuhi kun unsaon ninyo pag-amuma ang inyong pamilya ug umaabot nga mga anak.

Niining paagiha ang iyang panghunahuna inanay nimong mausab ug mamahimo siyang matured nga tawo. -- Tita Salie