Kahidlaw sa babaye

Gula 5

Human og panihapon nila ni Herbert, nananghid na siya sa iyang inahan ug amahan nga mosulod sa iyang kwarto. Iyang giingnan nga gikapoy siya sa pagduwa og basket mao nga matulog na siya.

Apan dili ang pagkatulog ang tumong ni Herbert sa pagsulod og sayo sa iyang kwarto. Gihukas niya ang iyang gisul-ob nga basketball short. Ang wala niya mahukas nga panti sa babaye mao na lang ang nahabilin.

Takulahaw lang usab dayon nga mitimbakuwas ang iyang pagka lalaki. Kalit misantop sa kaisipan ni Herbert ang panagway ni Charina nga mipahiyom kaayo diha’ng iyang giingnan nga sweet dreams sa dayon niya nga paglakaw gikan nga nagpalit og softdrinks.

Milad-ok si Herbert og laway. Gipiyong niya ang iyang mga mata ug gihanduraw niya si Charina. Wala damha nga nakatulog si Herbert. Nagdamgo. Sa damgo nagkuyog sila si Charina ug iya na kini nga gidaygan sa iyang pagbati.

Gitalikdan si Herbert ni Charina nga midagan pahilayo kaniya. Nakamata si Herbert gikan sa iyang katulogon. Nakapanglingo-lingo. Wala niya hatagi og gibug-aton ang iyang damgo. Nakabasa man gud si Herbert sa nipos nga libro ni Amading Abad kaniadto nga nag-ingon nga usahay balit-ad ang kahulogan sa damgo.

Kun balit-ad nagpasabot nga si Charina mosuod kaniya sukwahi sa iyang nadamgohan nga kini nagpalayo. Mibalik siya pagkatulog human siya makailis sa iyang short pants. Pagka- buntag, sayo nga nakamata si Herbert.

Naligo dayon siya kay may sabot sila ug ang barkada nga magduwa og basketball inigka-alas nueve. Human sila makakaon sa breakfast, nananghid si Herbert sa iyang inahan nga molakaw. Sa makausa pa, moagi na usab si Herbert sa balay nila ni Charina. Swerte kay nalantawan niya si Charina nga nagtapis og tualya. Gikan na usab kini nga naligo sa ilang banyo nga nahimutang gawas sa ilang balay.

Wala na mobati pa og kauwaw si Herbert. “Good morning Char. Swerte g’yud ko kay kanunay nako ka nga makit-an nga human nga maligo.” Mipahiyom si Charina kang Herbert.

“O kay nagsabot mi ug ang akong mga amiga nga manan-aw mi sa duwa sa basketball sa unahan nga tennis court,” sa dalaga pa. Nakasabot si Herbert nga ang giingon nga duwa sa basketball nga tan-awon nila ni Charina mao ang ilang duwa uban sa iyang mga barkada.

“Mao ba? Magkuyog na lang ta Char kay moadto man ‘sab ko,” matud ni Herbert. (Sumpayan)