Isla Paraiso

Gula 192

Ang gitaho ni Corporal David Benturada ngadto kang SPO3 Rey Corpuz nakahatag og dili tiaw nga kabalisa sa naulahi. Gikidnap si sister Veronica? Ang maong balita sama sa usa ka bomba nga gipabuto sa atubangan ni Rey.

“Kanus-a lang kini mahitabo, Benturada?” Nagpakisayod si Rey.

“Kaganinang alas otso pasado kuno, Sir,” tubag ni Benturada, “sumala sa giasoy sa madre superyor. Kalit lang kunong misulod sa kombento ang lima ka tawo nga pulos armado ug gipangtiunan silang tanan sa sulod sa kumbento. Wala sila makalihok sa dihang gipugos pagdala sa maong mga tawo si sister Veronica.”

Napaak ni Rey ang iyang mga ngabil.

“Unsa may atong buhaton karon, Sir?” Nangutana si Corporal Benturada pagkilab sa pipila ka gutling.

“Paabota lang ko diha sa presinto,” ni Rey pa. “Karon dayon moanha ako.”

“Ikaw ang mag-igo, Sir.”

Human sa ilang panagsulti ni Corporal Benturada, nag-ilis gilayon si Rey. Maoy iyang gisul-ob ang sapatos nga panit, karsones nga maong nga giparesan sa longsleeve nga budlisbudlis ang desinyo.

Gisapawan niya kini sa diyaket nga itom ang bulok. Gisuksok niya ang .45 kalibreng pistola sa iyang walang hawakan ug ang Uzi diha sa tuong bahin. -- Sumpayan pa