Iya sa yawa ang kasuko

Hubog na sab si Baldo nga miabot sa ilang balay. Kay gigutom nangukab sa ilang mga kaldero nga naglaray sa ilang abuhan. Naay kan-on, pero wala’y sud-an. Gitawag niya si Boyet, iyang kinamanghorang anak.

Nagdali si Boyet nga misaka sa ilang itaas. Iyang gibiyaan ang kadula niya’g games didto sa internetan nga anaa ra mahimutang duol sa ilaha.

“Ngano, Tay?”

“Diay tibuok P50, paliti ko’g humba sa merkado. Dali, ha?” Sugo-kondisyon sa palahubog nga amahan. Tuod man, mora’g giduslita’g kalayo ang sampot sa bata. Haskang daliang nakabiya.

Apan nadugay si Boyet. Gutom na si Baldo ug gusto nang mokaon. Nagsugod na’g pamalikas ang hari sa pamilya. Nakahunahuna si Baldo nga iya na lang apason si Boyet aron masayran unsay nadugayan niini. Dihang naghangos si Boyet nga miabot.

“Tay, wala nay humba sa tanang tindahan, uy. Hurot na. Mao nga masyaw na lay akong gipalit. Gihurot nako’g bagdok ang gihatag mong P50 sa numero: 413.”

“Punyeta!!!” Miulbo ang tumang kasuko sa amahan. “Humba ang akong gisugo. Ug dili masyaw!!! Unsa, imo kong pakan-o’g papel? Bugo ka gyod bata-ana, ka!” Gilunit ni Baldo ang dunggan ni Boyet, unya gisagpa pa gyod. Natulingig ang aping sa bata ug nagpakiluoy:

“Ayayy, Tay, pasayloa lang ko. Di na lagi ko mousab. Unsaon, gusto man sab kong makadaog aron may ikapalit ko’g bag-ong sinina. Busloton na tawon ni akong t-shirt ug purol, Tay, uy!” Pahayag sa bata nga naghilak.

Apan mipasamot hinuon kini sa kalagot nga midaob sa kinatibuk-ang galamhan ni Baldo. Unya, dinha may dos por dos nga barateha sa iyang duol, daw gipanglimutan siya. Iya kining gikuha ug gihapos ngadto sa ulo ni Boyet. Daw dunay binuntang lubi nga nabuak. Mituasik ang dugo, nalup-og si Boyet sa sawog nga wala nay kinabuhi.

Pagka ugma, ang numero sa masyaw nga gibagdokan ni Boyet maoy midaog. Imbes kalipay ang bation ni Baldo, wala’y hunong nga kaguol ang miagas sa iyang mga mata samtang naggunit sa mga rehas nga mibilanggo kaniya. Karon pa niya masuta: ‘Nga ang kasuko nga bation sa tawo, iyaha sa yawa.’ Magmahay man siya. Ulahi na ang tanan. (Kataposan)