Kriminal

“Tansyong, lukota na ang banig mo kay makagawas ka na!, pyansado ka ni Mr. Kwong kay tawo ka kuno niya,” pulong sa guwardiya sa prisohan sa bilanggoan sa ilang probinsya.

“Pagdali diha kay naghuwat siya kanimo sa gawas,” dugang pa sa gwardiya.

Napriso si Tansyong sa salang pagpusil-patay ni Tiago Kirat sa bulangan.

“Kumusta Tansyong? Gipyansahan tika kay may ipatrabaho ko nimo. Tana, uban ta sa balay para magkaestoryahanay ta’g maayo,” timbaya ni Mr. Kwong kang Tansyong ug giagbayan niya ang naulahi sa dayong gawas sa prisohan.

Pinanser si Mr. Kwong sa masyaw ug sa swertres sa ilang lungsod. Pag-abot sa balay ni Mr. Kwong gisugat dayon sila sa gate ni Kadyo, usa sa mga bata-bata sa nahauna.

“Maniudto usa ta aron busog atong tiyan samtang mag-estoryahay,” agda ni Mr. Kwong.

Pagkatapos sa paniudto, mipadulong sila sa payag-payag likod sa balay kay hayahay ang huros sa hangin didto. Sa nakapahiluna na sila, misugod og estorya si Mr. Kwong.

“Likidahon mo si Bosyong Pangag kay gikompetensiyahan ko niya sa negosyong masyaw ug swertres. Dili ka na mahimo!”, pangusmo pa ni Mr. Kwong. Mipadayon siya, “Niay pistola kalibre .45 ni maoy gamita sa pag-ihaw niya!

“Sus, ayaw kabalaka bossing!, sisiw ra ka nang trabahoa unya pilay money ning trabahoa?”, nangutana si Tansyong.

“Singkwenta mil, katunga akong down ug ang katunga inigkahuman na sa misyon ug siguroa nga limpyo ang pagkatrabaho’’ ni Mr. Kwong nga mitunol sa binandol-bandol nga kwarta.

Gidawat ni Tansyong ang katungang bayad, giluklok dayon ang armas ug dayong sakay sa motorsiklo nga giandam na sa mga tawo-tawo ni Mr. Kwong.

Pagka sunod adlaw, gipanup-an dayon niya si Bosyong Pangag ug nakita niya kini nga siging ihap sa kwartang gi-remit sa iyang mga aser isip  halin sa masyaw ug swertres nianang adlawa.

Wala maglangan si Tansyong ug sa dihang pusilon na unta niya si Bosyong Pangag apan mikagar kon wala mobuto ang armas bisan makaduha nang gikablit ang gatilyo niini.

“Oy! Paltik diay ning armas hinimo sa Danao,” nakatuaw si Tansyong ug dayong lanog sa buto sa armas gikan sa tawo ni Bosyong Pangag nga si Totoy Hitman.

Maayong pagkaigo sa ulo ni Tansyong dayong kahagba sa yuta nga wala nay kinabuhi. (Katapusan)