Duha ka iring sa ungo

Nag-abot ang gininhawa ni Elyong dihang gilutos siya sa duha ka iring nga hilabihan kabangis. Sa sinugdanan iya kining gipatiran dihang nag-atang sila sa agianan apan kalit lang giluksoan si Elyong ug gipamaak ug gipangawras. Ug tungod niini misutoy siya’g dagan ug sagol tumbatumba ang iyang pagdagan nga nagpaninggit. Ug kay diha may nag-inom sa tindahan ni Inse Umang, midali kini’g sugat kang Elyong.

“Naunsa ka, Elyong, uy, nagkadugo ka ug duna kay daghang kinawrasan ug pinaakan,” ni Pabling pa nga anak sa kapitan dinhi sa ilang baryo. “Naunsa ka man?”

“Gibugno ko’g duha ka iring, mga mangtas nga iring!” ni Elyong pa nga nagkanguhal.

“Mangtas nga iring ug duha ka buok?” miiknat ang kilay ni Pabling. “Mga ungo tingali to sila...”

Miyango si Elyong. “Oo, mga ungo kadto sila ug diha sila dapit mag-atang tungod sa balay ni Rustica...haaa...haaaa.”

“Si Rustica ang biyuda, mao ba?”

“Oo. Si Rustica biyuda.”

Tungod niini, nakahukom sila si Pabling nga ilang adtoon si Rustica. Pag-abot nila sa balay ni Rustica, gipadayon sila sa biyuda gidalitan sila’g mainom. Wala mo-inom si Pabling ug duha niya ka kuyog nga tanod. Unya nahaigking si Pabling dihang may mibaiid sa iyang tiilan. Usa ka iring itom, unya misunod pagtuhiltuhil sa iyang bukton ang usa ka banbanon nga iring. “Imo ning mga iring, Rus?” ni Pabling.

“Oo. Ngano man diay?” mitan-aw si Rustica kang Pabling.

“Kagabii ba, si Elyong gibugno ug gilutos sa duha ka bangis nga iring ug dinhi kuno sa inyong tungod mag-atang,” ni Pabling nga way lipod-lipod pagsulti.

“Unya, nagduda mo, nga ang duha ko ka iring maoy nagbugno kang Elyong, mao ba?” dihay pinugngang pahiyom sa mga ngabil ni  Rustica.

Wala motingog sila si Pabling. Unya...

“Ikaw, Pabling, sayod man kong naibog ka nako, he, he, he, sige mga hinanib kong mga iring, bugnoa sila si Pabling ug patya ang tulo ka mga tanod ug si Pabling maoy ibilin kay sukad karon dili na siya makabalik pa sa ila, kay anhi na siya uban nako, nga usa ka binilanggo, he, he, he, wakkk! wakkk!” (Kataposan)