Na in-love og pari

Gula 6

Nagtuo g’yud si Sheena nga manguyab kaniya si Fr. Jonas. Iyang gihuna-huna nga bisan og nakagusto siya sa pari, apan dili dayon niya kini sugton. Naglibog usab si Sheena kun unsay dangatan sa ilang gugma kun sugton niya ang pari panahon nga kini manguyab na.

“Mosugot ka ba Sheen kun adunay manguyab nimo nga kaliwat og pari?” gisukna ni Fr. Jonas ang dalaga nga nakapa-amang kaniya’g kadiyot. Wala g’yud makatingog si Sheena. Gitutokan niya si Fr. Jonas ug gibuhong ang iyang mga mata sa kaambongan sa pari.

Nagtinutokay sila’ng duha si Sheena ug Fr. Jonas. Mora’g gusto nga tugkaron sa pari kun unsa’y anaa sa huna-huna sa dalaga sa iyang gisulti. Taud-taod, hinay nga misulti ang pari ug mipasabot ni Sheena.

“Bisan wala pa kaayo kita magkasuod pag-ayo Sheen, apan nasabtan nako nga buotan ka nga pagka-babaye. Aduna ko’y kaluha nga hilabihan usab kabuotan nga mahadlok g’yud manguyab og babaye. Gusto ko nga magkaila kamo, kay pila’y palad sa unggoy, kun magkasabot mo?” gisagolan og komedya ni Fr. Jonas ang iyang gisulti.

Ingon sa gibati’g kaluya si Sheena. Napawong ang iyang kadasig nga nagtuo na unta nga panguyaban siya sa pari nga hilom niya nga naibgan. Wala siya magtingog. Gipaandar niya ang iyang huna-huna ug gisabot pag-ayo ang gisulti sa pari kaniya. Nakita ni Sheena nga gipunit sa pari ang iyang selpon nga diha gibutang ibabaw sa iyang lamesa. Gipindot-pindot kini sa pari, dayon gitapion kini sa iyang dunggan. Taud-taud.

“Hello? Jonnel, pwede ka ba makaari sa kombento karon dayon?” matud ni Fr. Jonas ngadto sa iyang kaestorya. Pagbutang ni Fr. Jonas sa iya’ng selpon, miatubang dayon siya ka’ng Sheena ug mipahiyom.

“Moari ang akong kaluha Sheen. I hope nga unta susama ang imong pagtagad kaniya sa gipakita mo kanako,” matud sa pari. Gihatud sa sakristan ang gipangayo sa pari nga coffee ug juice.

“Imna usa kana’ng juice Sheen. Ania na kadto si Jonnel nga akong kaluha kay anaa ra man sa unahan ang among balay,” giingnan ni Fr. Jonas si Sheena. Taud-taud, may nanuktok sa pultahan sa kwarto sa pari.

“Sulod lang,” matud ni Fr. Jonas. Napasiga ang mga mata ni Sheena pagkakita sa tawo nga misulod. Wala g’yuy kalainan ang panagway nila ni Fr. Jonas ug sa iyang kaluha.

“Brod, mao kini si Sheena, buotan nga parokyano ug tigsimbahan dinhi sa Mabolo,” gipaila sa pari si Sheena ngadto sa iyang kaluha. Daw nahilis sa kauwaw si Sheena. (Sumpayan)