Isla Paraiso

Gula 186

“Daghang salamat sa imong pagluwas sa akong anak, Corpuz,” nagkanayon si Capt. Benale ngadto kang Rey.

“Wala’y sapayan, Sir,” matud ni Rey nga mipasiklap sa maanyag nga anak sa kapitan. “Katungdanan ko ang pagluwas ilabi na sa imong anak.”

“Siya si Blessilda,” gipaila sa kapitan ang iyang anak ngadto kang Rey.

“Hi,” timbaya ni Blessilda ngadto sa ulitawo.

“Ug, iha,” ni Capt. Benale ngadto sa iyang anak, siya si Rey Corpuz, ang numero uno kong sinaligan sa Theft and Robbery Section sa presinto 10.”

“Wala ka masayop sa pagpili kaniya, papa,” ni Blessilda pa. “Tinuod gayod nga kasaligan siya.”

“Daghang salamat sa imong pagdayeg,” ni Rey. “Flattered ako sa imong gisulti.”

Naputol ang ilang panagsulti sa dihang may mga ambulansiya nga nangabot sa gawas sa banko. Gimandoan ni Capt. Benale ang iyang mga sakop sa pag-ugkat sa mga patay aron ikarga kini sa mga ambulansiya nga nag-urong sa gawas.

Ang pakyas nga bank robbery diin napatay sa kapolisan ang mga tulisan nga maoy misulod sa banko maoy headline sa mga mantalaan sa dakbayan sa Sugbo nianang pagkaugma. Gibutang sa front page ang hulagway ni SPO3 Rey Corpuz nga maoy nangulo sa unit nga naglikidar sa mga tulisan. -- Sumpayan pa