Na in-love og pari

Gula 5

Samtang nagpadayon pag-misa si Fr. Jonas, makabantay si Sheena nga mopasiklap gayud ang pari kaniya. Gikahimuot kini sa hilom sa dalaga ug ingon hinuon siya sa wala na mahimutang. Human sa misa, wala dayon motindog si Sheena sa iyang gilingkoran. Gipanid-an niya ang pari. Miduol kini sa usa ka sakristan ug adunay gihunghong. Mitan-aw ang sakristan sa atubangan ug miyango-yango.

Pagbiya sa pari, milakaw usab ang sakristan apan paingon kini sa nahimutangan ni Sheena. “Ikaw ba ang amigo ni Fr. Jonas ma’am?” matud sa sakristan. Miyango lang si Sheena.

“Maghuwat kuno siya nimo sa kumbento, paubanan ka niya nako paingon sa kumbento,” giingnan si Sheena sa sakristan. Wala masayod si Sheena kun unsa’y iyang buhaton apan wala siya mobalibad.

“Sige, tana,” ni Sheena pa. Nalantawan ni Sheena si Fr. Jonas nga naglingkod atubangan sa lamesa. “Dali sulod Sheen,” matud sa pari. Nananghid ang sakristan sa pari nga mobiya apan gipakuha kini sa pari og ilang mainom.

“Nalipay ko nga nakakita nga misimba ka pagbalik Sheen. Kaloy-an ka sa Ginoo niana’ng imo’ng gihimo,” matud sa pari. Gitutokan sa pari si Sheena.

“May boyfriend ka na ba Sheen? Maanyag ka ug sigurado ko nga dili gayud mosipyat nga aduna ka na’y hinigugma,” matud ni Fr. Jonas. Gikulbaan kaayo si Sheena nga nakadungog sa pangutana sa pari.

Wala ilimod ni Sheena nga may boyfriend na siya apan wala na’y klaro ang ilang relasyon. Gitug-anan ni Sheena ang pari nga misamot ang ilang panagsungi diha nga nadugay siya pagtunga sa ilang gikasabotan kaniadtong Domingo kay mitambong man siya og misa.

“Nakagusto ko nimo Sheen tungod kay tan-aw nako, buotan ka nga pagka babaye,” matud sa pari. Bisan og hilom nga may pagbati si Sheena sa pari apan gikulbaan kaayo siya. Diha sa iyang huna-huna nga pangulitawhan na gayud siya ni Fr. Jonas.

Mora’g miabot na karon sa huna-huna ni Sheena nga ang ubang pari dili gayud diay makatuman sa ilang panaad nga dili makigrelasyon og babaye. Gihuna-huna daan ni Sheena kun unsay iyang himoon kun manguyab na ang pari kaniya.

Daw mahilis si Sheena sa iyang gilingkoran nga gisigihan og tutok ni Fr. Jonas. “Gwapa ka gayud kaayo Sheen. Nagtrabaho ka ba?” pangutana sa pari.

Miyango lang si Sheena ug mitan-aw sa pari. Mipahiyom siya apan daw hilaw tungod kay gidaog siya’g kauwaw. Gihuwat ni Sheena kun unsaon siya sa pagpanguyab sa pari. (Sumpayan)