Isla Paraiso

Gula 185

Dinhi nakahigayon na si Rey. Gipusil gilayon niya ang tulisan tumong gayod sa lawas niini. Natusak sa mga bala ang lawas sa tulisan. Wala kini lung-i pagpusil ni Rey hangtod nga nahutdan og mga bala ang .45 kalibre. Ang tulisan nahasandig sa bungbong nga nagsiga ang mga mata. Unya inanay kining nalusno sa salog. Unya nahapaumod kini. Wala nay kinabuhi.

Ang babaye nga gi-hostage sa tulisan wala pa makalihok sa gibarogan niini. Naniga ang iyang mga mata nga nagtan-aw sa tulisan nga mi-hostage kaniya nga wala nay kinabuhi.

Wala madugay, may mga tinugyanan sa balaud nga misulod sa banko. Nag-una kanila si Capt. Sancho Benale, ang labaw ni Rey. Gisugat sa babaye nga maanyag ang kapitan.

“Papa!” Gigakos sa babaye ang kapitan.

“Iha!” Gigakos usab ni Capt. Benale ang babaye. Dihadiha nakasabot si Rey nga ang maong babaye mao diay ang anak ni Capt. Benale nga nag-alagad sa banko nga gitulis.

“Wa ka ba maunsa, anak?” Sukot ni Capt. Benale.

“Wa man, Papa,” tubag sa babaye. “S-siya ang nagluwas kanako gikan sa mga kamot sa tulisan nga mi-hostage kanako.”

Gitudlo sa babaye si Rey nga nagbarog dili layo sa nahimutangan sa amahan ug anak.

“Siya si SPO3 Rey Corpuz, anak,” matud ni Capt. Benale nga midali pagduol sa nahimutangan ni Rey kauban ang maanyag niining anak. -- Sumpayan pa