Isla Paraiso

Mihisay si Rey og kamang paingon sa gipasalipdan niini. Apan wala na didto ang kaaway sa iyang paghitukma sa dapit diin kini magtago kaganina. Misamot ang gibati niyang kalagot nga naghunahuna nga abtik usab ang maong tulisan. Nakamatikod kini sa iyang pagkamang.

Unya nasigpatan niya kini nga miguho gikan sa luyo sa usa ka lamesa. Gipusil siya niini. Midali siya pagligid aron dili maigo sa mga bala nga gibuga sa armas nga gikuptan niini.

Sa dihang milunga ang kaaway sa pagpusil kaniya, kalit siyang mibaro’g dungan ang pagkablit sa gatilyo sa iyang Uzi. Naabtan pa sa iyang mga mata ang kaaway nga midali pagpasalipod sa lamesa. Dihadiha si Rey naglakaw paduol sa lamesa nga gipasalipdan sa kaaway samtang nagpunay’g kablit sa iyang Uzi. Wala niya lung-i sa pagpabuto ang kaaway aron dili kini mogawas sa gitagoan niini. Gitionan gilayon niya siya sa sumbohan sa Uzi ang tampihak sa kaaway. Ug sa dihang mihana kini paggamit sa hinagiban nga gikuptan, iyang gikablit ang gatilyo sa Uzi ug nabuak ang bagulbagul sa tulisan.

Unya kalit lang nahalingi si Rey sa iyang luyo pagkabati og mga kasikas. Sa iyang pagliso nga hugot nga paggunit sa Uzi, mao dayoy misugat sa iyang mga mata ang usa ka tulisan nga may gi-hostage nga batan-ong babaye. Ang armas sa tulisan giduot niini ngadto sa liog sa babaye. -- Sumpayan pa