Ang bayot ug tomboy - Gula 7

“May kaugmaon pa kaha nga nagpaabot kanato Macky? Human nako talikdi sa hingpit ang akong pagka-tomboy, may lalaki pa kaha nga mahigugma kanako,” matud ni Mayet samtang naghangad kini nga lawom kaayo ang paghuna-huna.           

Wala dayon motubag si Macky sa iyang amiga. May gihuna-huna kini kay mikunot man ang duha niini ka kilay ug misundog ni Mayet sa paghangad usab sa kisame. “Iampo nato Mayet ngadto sa Kahitas-an nga ikahibalag ra nato ang atong mga lifetime partners,” ni Macky pa.

Takulahaw lang mibunok ang kusog kaayo’ng uwan. “Hala, kakusog sa uwan Mayet. Unsaon nako karon sa pagpauli,” mabalak-on kaayo si Macky. “Ayaw kabalaka gud, kun dili motuang ang uwan, dinhi ka matulog,” tubag ni Mayet.

Padayon ang pagbunok sa kusog kaayo’ng uwan sa gawas. Giubanan na kini og mga pagpanugdog ug kilat. Kahilom ang mihari kanila ni Mayet ug Macky samtang nagpaminaw sa kusog kaayo nga uwan. Unya, kalit lang milanog ang kusog kaayo’ng dugdog ug dungan nga napawong ang kuryente! Napagakos si Mayet kang Macky tungod sa kahadlok. Sa ilang pamati, mora’g diha ra gayud duol sa ilang nahimutangan magagikan ang lanog nga buto sa dugdog.

Mibawos paggakos si Macky ni Mayet nga gibati og tuman nga kahadlok. Gipun-an pa gayud og laing kusog gihapon nga dugdog. Nagginaksanay sila si Mayet ug Macky. Wala damha nga gibatyag ni Macky ang talagsaon nga pagbati nga sukad-sukad wala pa niya mabatyagi.

Ingon sa nanghugot pag-ayo ang iyang kaunoran. Gibatyag niya ang lumoy kaayo’ng lawas ni Mayet nga iya’ng gigakos. “Mayet, motuo ka ba kun ingnon ko ikaw nga nabalaka ko nga dag-on sa tentasyon niini’ng atong sitwasyon?” matud ni Macky. “Macky, wala ako makasabot sa akong gibati nga imo akong gihugtan sa paggakos. Karon pa ako sukad-sukad makatagamtam og gakus sa usa ka lalaki,” matud ni Mayet. Pareho sila’ng duha si Macky ug Mayet nga nagkuba-kuba ang masi’g ka dughan sa wala pa nila matugkad nga pagbati.

Nabatyag ni Macky nga mituskig ang iyang dapit sa iyang atubangan samtang padayong migakus ni Mayet. Wala na gayud makaagwanta pa si Macky. Gihagkan niya si Mayet sa lips. “Macky, Mack,” nalitok ni Mayet ang mga ngalan sa kanhi mahuyang nga karon nahimo na nga hingpit nga lalaki.

Wala na makabalibad si Mayet dihang giukoban na ni Macky ang iyang mga ngabil ug hugot na kaayo ang paggakus kaniya. Padayon ang pagbunok sa kusog kaayo’ng uwan sa gawas nga ingon sa maoy naghatag og higayon nga mabugkos ang masi’g nila ka mga pagbati.

  “I love you Macky.” Love you too, Mayet,” (Kataposan)