Ikaw, Ma, ang hinungdan nganong naadik ko

Motipon lang si Niko sa mga higala niyang tin-edyer nga nanglingkod sa lantay ilawom sa labong bombil duol sa tindahan ni Nang Nora, siyagitan dayon kini ni Dita: “Hoy, Nikooo!!! Nag-unsa ka diha? Miapil na sab ka anang grupo sa mga adis-adis? Hala, pauliiii!!!”

“Nag-istoryahanay ra man mi, Ma.” Hinay’ng esplikar ni Niko nga dali rang nakasaka sa ilang balay. Nagkurog sa kahadlok.

Nagtubo si Niko sa kabastos sa kinaiya sa iyang mama Dita. Hangtod na-college siya, nagpabilin ang pagkaratatat og baba sa iyang tigreng inahan. Abi sa iyang inahan kun makatul-id kini sa dalan nga gisubay sa iyang anak. Apan nasayop siya. Kay miabot ang sudya sa panahon nga wala damha ni Dita.

Bukog na la’g panit ang makaluluoy’ng lawas ni Niko. Sama na kapula sa galansiyang ang mga mata niini. Kanunay’ng nagtutok sa wala. Gipaeskuyla man tuod og Marine Engineer, pero walay sulodsulod sa klase. Kuwartang ipadala para sa eskuylahan, dili ibayad. Tanang academic subject hagbong. PE  ray gipasaran. Full-pledged addict na si Niko. Nahayblad pagsamot ang iyang Mama’g Papa.

Nanglupad ang mga kumo sa iyang papa. Mituasik ang yawyaw sa iyang Mama: “Wa kay ulaw! Gipaeskuyla ka aron mahimong tawo, nag-adik-adik nuon kang buwisita ka!” Napalid si Niko nga naigo sa suntok sa iyang amahan. Nagdugo pa gyod ang iyang wait human paloapig laparo sa naminti niyang inahan.

Mihilak si Niko. Midanguyngoy. May gikuha sa iyang hawak -- 45 kalibreng pistola. Unya sa hinurot nga tingog misiyagit: “Adik bitaw ko.” Niini pa nga mikak sa armas nga gipunting niya sa iyang mga  ginikanan. Naamang ang mga gutlo. Mikurog ang matag pitik sa mga gutling. Nagpaabot sa unsay sunod mahitabo. Taudtaod, milango ang katawa ni Niko: “Adik na bitaw ko, Ma. Pero, hibawo ka, Ma,” giduol ni Niko si Dita nga naestatuwa. “Ikaw, Ma...” Mitibi na usab ang ulitawo. “Ikaw, Ma, ang hinungdan nganong naadik ko. Di ko ninyo mahal. Wa moy gugma nako. Sige lang ko ninyo kasuk-an. Busa, maypa matapos ang tanan.” Ug dihadiha, gikablit ni Niko ang gato sa pistola.

“Ayawwwww!” Mialingawngaw ang tingog-tingog sa babaye’g lalaki dungan sa pagbuto sa armas. Ug may nahagba sa salog nga wala nay kinabuhi. (Kataposan)